Фестываль-кірмаш «Дажынкі-2025» у Крычаве: ушаноўванне хлебаробаў, адкрыццё новых аб'ектаў і канцэрты

Фестываль-кірмаш працаўнікоў вёскі «Дажынкі-2025» у Магілёўскай вобласці пройдзе сёння, 4 кастрычніка, у Крычаве.

Цэнтральнай святочнай пляцоўкай стане плошча побач з будынкам райвыканкама. Ужо з 10 гадзін раніцы пачне сваю работу выстава-кірмаш «Дажыначны кірмаш», дзе разгорнуцца выставы-прэзентацыі аграпрамысловага патэнцыялу, а таксама будуць прадстаўлены турыстычныя, культурныя брэнды Магілёўшчыны.

Кульмінацыяй свята стане ўрачыстая цырымонія ўзнагароджання пераможцаў спаборніцтва ў развіцці аграпрамысловага комплексу <br>галоўнай канцэртнай пляцоўцы. А ганарыцца магілёўскім хлебаробам ёсць чым: за апошнія пяць гадоў гэта лепшы ўраджай — уклад у рэспубліканскі каравай склаў каля 1 мільёна 300 тон, што на 42 працэнты больш, чым у 2024 годзе.

Тут жа адбудзецца святочны канцэрт «Слава людзям, што працуюць на зямлі!».

Нікому сумна не будзе, абяцаюць арганізатары фестывалю-кірмаша. Гандлёвыя рады з пачастункамі і сувенірамі, выстава беларускай сельгастэхнікі, інтэрактыўная дзіцячая пляцоўка, спартыўная праграма на стадыёне «Сож». У раённым Цэнтры культуры пройдзе выстава фатаграфій «Жніво-2025».

На галоўнай канцэртнай пляцоўцы выступленні лепшых артыстаў вобласці будуць праходзіць у рэжыме нон-стоп: арт-гурт «Магілёўцы», народныя вакальныя ансамблі «Вольны стыль», «Горліца», «Пацэха», танцавальна-забаўляльная праграма з удзелам дыджэяў.

Крычаў рыхтаваўся да свята: рамонт дамоў, сацыяльных аб'ектаў - гасцініцы, бібліятэкі, абнаўленне праезнай часткі і пешаходных дарожак. Пераўтварылася турыстычная, культурная і гістарычная жамчужына раёна - палац Пацёмкіна: тут абнавілі фасад, замянілі ўваходную групу, вентыляцыйныя сістэмы, з'явіліся новыя інтэр'ерныя залы «Дарожныя пакоі Кацярыны II». Але самым доўгачаканым для жыхароў Крычава стане адкрыццё новай паліклінікі.

Фінальны акорд свята - вячэрні феерверк.

СБ