Фінансаванне дзейнасці тэатраў і бібліятэк будзе павялічана ў Беларусі

У Беларусі будуць павялічаны нарматывы забеспячэння бягучай дзейнасці тэатраў і дзяржаўных бібліятэк. Гэта прадугледжана пастановай Савета Міністраў ад 2 кастрычніка 2025 года нумар 548, якая апублікавана на Нацыянальным прававым інтэрнет-партале.

У новай рэдакцыі выкладаецца дадатак да пастановы Савета Міністраў ад 12 снежня 2023 года нумар 874 «Аб рэалізацыі Указа Прэзідэнта Рэспублікі Беларусь ад 31 жніўня 2023 года нумар 275».

Згодна з дакументам, павялічваецца нарматыў забеспячэння бягучай дзейнасці тэатраў. У прыватнасці, для Нацыянальнага акадэмічнага Вялікага тэатра оперы і балета ён вырас з Br44,56 да Br55,42, для Беларускага дзяржаўнага акадэмічнага музычнага тэатра - з Br29 да Br50, для Маладзёжнага тэатра эстрады - з Br24,16 да Br43,5, Тэатра-студыі кінаакцёра Br24,93 да Br41,05. Усяго ў спісе 28 пазіцый.

Як растлумачылі ў Міністэрстве культуры, нарматыў забеспячэння бягучай дзейнасці тэатраў улічваецца пры планаванні сродкаў рэспубліканскага або мясцовых бюджэтаў, што накіроўваюцца на фінансаванне расходаў, звязаных з ажыццяўленнем бягучай дзейнасці тэатраў.

Гэтай жа пастановай Савета Міністраў скарэкціраваны базавы нарматыў бюджэтнай забяспечанасці расходаў на аказанне паслуг дзяржаўнымі бібліятэкамі ў разліку на аднаго карыстальніка. Цяпер ён вызначаны ў памеры Br78,76 у год (раней Br69,9).

Базавы нарматыў з улікам карэкціруючых каэфіцыентаў, колькасці карыстальнікаў, якія абслугоўваюцца дзяржаўнымі бібліятэкамі, а таксама расходаў на ўтрыманне маёмасці дзяржаўных бібліятэк бярэцца ва ўлік пры разліку аб'ёму бюджэтных сродкаў, якія прадугледжваюцца на функцыянаванне дзяржаўных бібліятэк.

Пастанова нумар 548 уступае ў сілу з 1 студзеня 2026 года.

БЕЛТА