«Бабруйскаграмаш» мае намер пашырыць сваю прысутнасць у Фінляндыі

ААТ «Кіруючая кампанія холдынгу «Бабруйскаграмаш»» наведала дэлегацыя кіраўніцтва фінскай кампаніі Agri Kymi OY (г.Каўвола) на чале з кіраўніком Ханнай Пулканен.

Госці азнаёміліся з працай і магчымасцямі прадпрыемства, правялі з кіраўніцтвам «Бабуйскаграмаша» перамовы аб развіцці і паглыбленні супрацоўніцтва. У прыватнасці, дасягнуты дамоўленасці аб павелічэнні на 30-50% у першым паўгоддзі бягучага года аб’ёмаў рэалізацыі традыцыйных на фінскім рынку машын для ўнясення вадкіх арганічных угнаенняў і ротарных касілак. Таксама кіраўніцтва фінскай кампаніі праявіла зацікаўленасць у пашырэнні наменклатуры пастаўляемых сельгасмашын за кошт тэхнікі для ўнясення цвёрдых арганічных і мінеральных угнаенняў, трактарных прычэпаў і новых мадэляў касілак.

Для актывізацыі рэкламна-маркетынгавай працы на рынку Фінляндыі кіраўнікі кампаній прынялі рашэнне весці сумесную узгодненую працу па прасоўванні новых відаў тэхнікі на рынак з улікам патрабаванняў мясцовых аграрыяў да тэхнікі і асаблівасцяў умоў эксплуатацыі ў Паўночнай Еўропе.

Кампанія Agri Kymi OY з’яўляецца афіцыйным дылерам беларускага прадпрыемства на тэрыторыі Фінляндыі. У 2018 годзе бакі адзначылі 20-годдзе сумеснай працы. Шмат у чым дзякуючы менавіта працы фінскіх партнёраў фінскі рынак не толькі стаў традыцыйным для тэхнікі з маркай «Бабруйскаграмаш», але і найбуйнейшым сярод усіх рынкаў краін Еўрапейскага Саюза.

Бабруйскае прадпрыемства створана ў 1974 годзе. Акцыянавана ў 2005-м, а ў 2012 годзе стала кіруючай кампаніяй холдынгу «Бабруйскаграмаш», які з’яўляецца сёння адным з найбуйнейшых у Беларусі і СНД вытворцаў сельскагаспадарчай тэхнікі. Сёння прадпрыемства вырабляе больш за 80 найменняў сельскагаспадарчай тэхнікі для ўнясення ўгнаенняў, нарыхтоўкі і раздачы кармоў, уборкі лёну, прычапных транспартных сродкаў і г. д. Сельгасмашыны з маркай прадпрыемства працуюць амаль у 50 краінах свету.

БЕЛТА