Намеснік Кіраўніка Адміністрацыі Прэзідэнта Беларусі Андрэй Кунцэвіч правёў урок для адзінаццацікласнікаў Гарадзецкага ВПК д/с – СШ Шклоўскага раёна

Традыцыйна першага верасня ва ўсіх установах адукацыі Шклоўскага раёна адбыліся ўрачыстыя лінейкі, прысвечаныя Дню ведаў.

У цёплай сяброўскай атмасферы прайшла школьная лінейка і ў ДУА «Гарадзецкі КПК д/с – СШ Шклоўскага раёна». На плошчы перад будынкам школы сабраліся педагогі, вучні, а таксама іх родныя. Ганаровымі гасцямі свята тут сталі намеснік кіраўніка Адміністрацыі Прэзідэнта Рэспублікі Беларусь Андрэй Кунцэвіч, намеснік старшыні райвыканкама Сяргей Артамонаў, намеснік начальніка Галоўнага ўпраўлення ідэалагічнай работы і па справах моладзі Магілёўскага аблвыканкама Алег Пішчанка.

Адкрыла свята, па традыцыі, дырэктар школы Аксана Дарагонька. Яна павітала вучняў і пажадала ім поспехаў у наступным навучальным годзе, а таксама ўручыла вучням другога класа футбольныя мячы ад Беларускай федэрацыі футбола.

Віншуючы са святам вучняў, педагогаў, бацькоў, Андрэй Кунцэвіч адзначыў: «Дзень ведаў – асаблівы дзень, які дае старт новаму навучальнаму году і адкрывае перад вамі дзверы ў краіну ведаў. І наколькі шырока гэтыя дзверы будуць расчынены, залежыць непасрэдна ад вас, вашага цярпення, старання, стараннасці і жадання пазнаваць нешта новае, удасканальвацца і развівацца. Памятайце, вы – надзея бацькоў, педагогаў, сваёй малой радзімы і нашай краіны. Міру вам, дабра і дабрабыту». У якасці падарунка Андрэй Міхайлавіч перадаў школе кнігі – навінкі беларускіх выдавецтваў.

Далі слова і першакласнікам. Сёлета ў школе ўпершыню села за парты 11 чалавек. Са зваротнымі словамі пажадання для іх выступілі адзінаццацікласнікі і ўручылі кнігі «Беларусь – наша радзіма». Падарункі самым маленькім вучням уручылі таксама дырэктар ЗАТ «АСБ-Агра Гарадзец» Юрый Палтарак і старшыня Гарадзецкага сельвыканкама Ігар Букетаў.

Урачыстым момантам свята стаў школьны званок, які далі вучань 11 класа Мікіта Грэкаў і вучаніца 1 класа Дар’я Дзінцю.

Пасля заканчэння ўрачыстай лінейкі вучні адправіліся на свой першы ўрок. Дарэчы, у адзінаццатым класе яго правёў Андрэй Кунцэвіч. Ён не толькі расказаў прысутным аб сучаснай Беларусі, але і правёў экскурс па асноўных гістарычных датах, заадно праверыўшы веды вучняў. Акрамя гэтага, Андрэй Міхайлавіч пацікавіўся ў вучняў планамі на будучыню і пажадаў кожнаму з іх выбраць правільную дарогу ў жыцці. 

shklovinfo.by