Кантэйнеры для паасобнага збору смецця могуць атрымаць усе домаўладанні прыватнага сектара Магілёва

Кантэйнеры для паасобнага збору смецця могуць атрымаць усе домаўладанні прыватнага сектара Магілёва. Абласны цэнтр стаў першым такім горадам у Беларусі.

У Магілёве больш за 20 тыс. домаўладанняў. І да гэтага часу тут не было магчымасці арганізаваць раздзельны збор смецця. Цяпер жа на працягу года домаўладальнікам бясплатна выдадуць у карыстанне больш за 40 тыс. сучасных кантэйнераў для паасобнага збору смецця.

Ініцыятыву Магілёўскага спецаўтапрадпрыемства падтрымалі ў Міністэрстве ЖКГ. І на выдзеленыя грошы набылі ёмістую яркую тару.

Пакуль кантэйнеры, па два на домаўладанне, атрымліваюць жыхары цэнтральных вуліц. З паведамленнем і пашпартам іх чакаюць прама ў офісе спецаўтапрадпрыемства. Тут заключаюць дагавор, і адразу можна забіраць кантэйнеры. Народ на такую ідэю адгукнуўся.

Шэры кантэйнер – для адходаў, якія немагчыма перапрацаваць. Жоўты – для другасных матэрыяльных рэсурсаў.

Гэта ініцыятыва – не жэст добрай волі, а яшчэ адзін крок на экашляху. Усе выдаткі пралічаныя, і яны павінны акупіцца.

ТРК «Магілёў»