У Бабруйскім аздараўленчым лагеры «Мара» з 15 снежня адкрыецца рэзідэнцыя Дзеда Мароза

Рэзідэнцыя Дзеда Мароза ўрачыста адкрыецца 15 снежня на базе Бабруйскага аздараўленчага лагера «Мара». Хлапчукі і дзяўчынкі змогуць сустрэцца з казачнымі героямі, пагутарыць з Дзедам Марозам у яго ўтульным доме, пачаставацца духмянай гарбатай з блінамі, прыняць удзел у тэатралізаваным прадстаўленні, наведаць дом Бабы-Ягі, будан лесуна, пакатацца на санях ўладара халадоў і маразоў і многае іншае. Маляўнічая прырода, казачная атмасфера дазволяць займальна і цікава правесці час.

Як расказалі ва ўпраўленні па адукацыі, у гэты дзень тэатралізаваныя паказы пройдуць у 13.00 і 15.00. А з 21 снежня па 12 студзеня – у 11.00, 13.00 і 15.00.

Паводле папярэдняй узгодненасці, ёсць магчымасць правесці навагоднія паказы для арганізаваных груп дзяцей работнікаў прадпрыемстваў і арганізацый.

bobrlife.by