Больш за 150 кніг з архіваў Нацыянальнай бібліятэкі падарылі дэпутаты бабруйскаму дзіцячаму дому сямейнага тыпу

У госці да бабруйскай шматдзетнай сям’і Парфёнавых з падарункамі заглянулі дэпутаты Палаты прадстаўнікоў Нацыянальнага сходу Рэспублікі Беларусь Ірына Рынейская, Уладзімір Гацко, Вера Шырокая, прадстаўнікі адміністрацыі Першамайскага раёна. Для юных жыхароў дома сямейнага тыпу візіцёры перадалі ў дар больш за 150 кніг з архіваў Нацыянальнай бібліятэкі.

Літаратура самая разнастайная: пазнавальныя энцыклапедыі, руская, беларуская і замежная класіка, казкі, падручнікі. Дарэчы, у доме сямейнага тыпу любяць чытаць. Тут выхоўваецца 9 дзяцей ад 10 месяцаў да 15 гадоў.

– Мы вельмі рады падарунку. Хатняя бібліятэка заўсёды патрэбна. Дзеці растуць, вучацца, ім трэба больш інфармацыі, – адзначае маці-выхавальнік Таццяна Парфёнава.

Ініцыятыва падарыць кнігі з беларускай інтэлектуальнай скарбніцы належыць дэпутацкаму корпусу. Народныя выбраннікі пажадалі, каб кніга стала для дзяцей надзейнай крыніцай ведаў і сапраўдным сябрам па жыцці.

bobrlife.by