Беларуская цэментная кампанія адкрыла прадстаўніцтва ў Польшчы

Беларуская цэментная кампанія адкрыла ў Польшчы прадстаўніцтва-гандлёвы дом BKC-Polska Sp.zo.o., паведамілі ў БЦК.

«Узрослы ў 2019 годзе попыт на беларускі цэмент ва Усходняй і Цэнтральнай Еўропе прывёў да таго, што наша кампанія адкрыла ў пачатку гэтага года ў Польшчы сваё прадстаўніцтва. З яго з’яўленнем палепшылася лагістыка паставак, еўрапейскія партнёры з Польшчы, Германіі і іншых краін атрымалі магчымасць заключаць кантракты на прамыя пастаўкі», – адзначылі ў кампаніі.

Акрамя таго, БЦК прыняла ўдзел у Польшчы ў найбуйнейшым будаўнічым форуме BUDMA–2020, дзе прадпрыемствы холдынгу прадставілі ўвесь асартымент прадукцыі. Асаблівую цікавасць традыцыйна выклікаў цэмент, бо яго якасць пацверджана сертыфікатамі Расіі і Еўрапейскага Саюза. Па выніках выставы Беларуская цэментная кампанія заключыла больш за 20 папярэдніх дамоўленасцей аб пастаўках айчыннага цэменту ў Польшчу з прадпрыемстваў «Крычаўцэментнашыфер» і «Краснасельскбудматэрыялы».

Генеральны дырэктар ААТ «Крычаўцэментнашыфер» Уладзімір Карчэўскі лічыць, што ўдзел у гэтай выставе даў вельмі спрыяльныя вынікі. «Папярэднія дамоўленасці з патрабавальнымі да якасці цэменту польскімі партнёрамі дазваляюць смела казаць аб павелічэнні экспартных паставак у Польшчу з завода як мінімум на 10% у 2020 годзе», – падкрэсліў кіраўнік прадпрыемства.

БЕЛТА