Выстава старажытных прасаў адкрыецца ў Шклоўскім раённым гісторыка-краязнаўчым музеі

Выстава «Музей праса» адкрыецца сёння ў Шклоўскім раённым гісторыка-краязнаўчым музеі. Тут будзе прадстаўлена больш за 170 эксклюзіўных прасаў з Еўропы, Азіі, Амерыкі ад часоў сярэднявечча і да нашых дзён.

Выстава арганізавана пры падтрымцы УП «Мінгардаведка» і з’яўляецца мерапрыемствам месячніка «Карта госця»– турыстычнага сэрвісу, які дазваляе ўсім аматарам падарожжаў і тым, каму цікавая гісторыя Беларусі, аптымальна спланаваць маршруты для азнаямлення са славутасцямі нашай краіны і з максімальнай выгадай для свайго бюджэту.

Карта госця дае права аднаразовага наведвання (бясплатна або са зніжкай да 50%) уключаных у праграму турыстычна прывабных аб’ектаў: музеяў і экскурсій, мастацкіх галерэй, заапаркаў. На сённяшні дзень удзельнікамі праекта ў Магілёўскай вобласці з’яўляюцца 87 аб’ектаў.

Дарэчы, з выставай экспанатаў з мінскага Музея праса ў лютым ужо азнаёміліся жыхары і госці Чавус.