Зрабіць пашпарт за тыдзень зараз можна ва ўсіх раёнах Магілёўскай вобласці

Зрабіць пашпарт за 7 дзён зараз можна ва ўсіх раёнах Магілёўскай вобласці. Пра гэта паведаміў намеснік начальніка ўпраўлення па грамадзянстве і міграцыі УУС Магілёўскага аблвыканкама Віталь Астанковіч.

Паводле слоў суразмоўцы, з 1 сакавіка жыхарам Прыдняпроўскага краю прадастаўляецца дадатковая паслуга па тэрміновай дастаўцы дакументаў у Бюро пашпартызацыі насельніцтва УУС і вяртанні іх у падраздзяленні па грамадзянстве і міграцыі органаў унутраных спраў вобласці (прэйскурант № 5, зацверджаны 28.02.2020).

Парадак вырабу дакументаў да 7 дзён з дня падачы заявы прадугледжаны толькі для падраздзяленняў па грамадзянстве і міграцыі органаў унутраных спраў, размешчаных у Магілёўскай вобласці. У абласным цэнтры–гэта падраздзяленні ў Ленінскім, Кастрычніцкім і Магілёўскім РАУС.

«Грамадзянін, які звярнуўся ў падраздзяленне па грамадзянстве і міграцыі АУС раёна, зможа зрабіць пашпарт, від на жыхарства ў Беларусі або праязны дакумент у тэрміновым парадку за дадатковую плату», – расказаў Віталь Астанковіч. – Кошт гэтай паслугі неабходна ўдакладняць у падраздзяленні па грамадзянстве і міграцыі. Кошт будзе адрознівацца, паколькі разлічаны з улікам аддаленасці размяшчэння падраздзялення па грамадзянстве і міграцыі АУС ад абласнога цэнтра».