Фінал праекта «Уладар сяла» адбудзецца 10–11 ліпеня ў Александрыі

Фінальныя мерапрыемствы рэспубліканскага сямейнага сельскагаспадарчага праекта «Уладар сяла» адбудуцца 10–11 ліпеня ў аграгарадку Александрыя Шклоўскага раёна Магілёўскай вобласці падчас афіцыйнай праграмы свята «Купалле» («Александрыя збірае сяброў»), паведаміла сакратар Цэнтральнага камітэта Беларускага рэспубліканскага саюза моладзі Юлія Зінкевіч.

«З гэтага года гранд-фінал папулярнага сямейнага сельскагаспадарчага конкурсу, ідэйным натхняльнікам якога з 2007 года выступае БРСМ, атрымае пастаянную прапіску на свяце «Купалле» ў аграгарадку Александрыя. Менавіта тут у конкурсных выпрабаваннях за званне «Уладар сяла» пазмагаецца шэсць маладых сем’яў-пераможцаў абласных тураў гэтага праекта. Усе яны пражываюць, гадуюць дзяцей і працуюць у сельскай мясцовасці», – расказала Юлія Зінкевіч.

Так, Брэсцкую вобласць у фінале прадставіць сям’я Адамовічаў з аграгарадка Жамчужны Баранавіцкага раёна, Віцебскую – сям’я Зубко з аграгарадка Юнькі Пастаўскага раёна, Гомельскую – сям’я Шыпковых, якая жыве ў вёсцы Маркавічы Гомельскага раёна, Гродзенскую – сям’я Валюшка з вёскі Гудзевічы Мастоўскага раёна, Мінскую – сям’я Пракаповічаў з вёскі Заполле Слуцкага раёна. Гонар Магілёўскай вобласці будзе адстойваць сям’я Скотнікавых. Дарэчы, муж і жонка Павел і Вольга Скотнікавы з іх дачкой Вікторыяй пражываюць у аграгарадку Александрыя.

Для фіналістаў падрыхтавана насычаная двухдзённая праграма. «Першы дзень – заезд, праца па ўстаноўцы падворкаў, рэпетыцыі. Затым – афіцыйнае адкрыццё мерапрыемства і першая частка конкурснай праграмы «Працуем раЗАм». Сем’і памерацца сіламі ў сельскагаспадарчых спаборніцтвах «Пакармі цяля», «Касцы», «Птушнік», «Па дровы», якія пройдуць на тэрыторыі МТФ «Падкняжжа» ААТ «Александрыйскае». Наступны дзень для фіналістаў пачнецца з наведвання Трафімавай крыніцы і знаёмства з экспазіцыямі гісторыка-краязнаўчага музея Александрыйскай сярэдняй школы. Пасля гэтага на маладзёжнай пляцоўцы рэспубліканскага свята «Купалле» разгорнуцца асноўныя баталіі за пераможны тытул. Тут пройдзе другая частка конкурснай праграмы «Працуем раЗАм». У яе ўвайшлі выпрабаванні «Гаспадар i гаспадыня», «Вясковыя гульні», конкурс-прэзентацыя «Знаёмімся раЗАм», – адзначыла сакратар ЦК БРСМ.

Цырымонія ўзнагароджання пераможцаў адбудзецца на малой сцэне. «Кожная сям’я-фіналістка атрымае ў падарунак сертыфікат у памеры Br2160 (80 базавых велічынь) і сувеніры. Пераможцы праекта будуць ўдастоены тытула «Уладар сяла-2020». Завершыцца конкурсны дзень сумесным праглядам гала-канцэрта “Мая Александрыя”», – дадала Юлія Зінкевіч.

Традыцыйна праект «Уладар вёскі» рэалізуецца ў тры этапы. Сезон-2020 таксама не стаў выключэннем, але ўпершыню за ўсю гісторыю конкурсу раённыя і абласныя туры прайшлі ў анлайн-фармаце. Дарэчы, сёння ў афіцыйным акаўнце моладзевай арганізацыі «УКантакце» «Беларускі рэспубліканскі саюз моладзі | БРСМ» і на канале «BRSM 2.O» відэахостынгу YouTube стартавала галасаванне ў дадатковай намінацыі «Уладар сяла ONLINE» за найлепшы відэаролік з удзелам сем’яў-фіналістаў. Галасаванне завершыцца 11 ліпеня ў 15.00. Пераможцу вызначаць па сумаванай колькасці адзнак «падабаецца».

Арганізатарамі гранд-фіналу выступаюць БРСМ, Міністэрства адукацыі, Міністэрства сельскай гаспадаркі і харчавання, Беларускі саюз жанчын.

БЕЛТА