Намеснік старшыні ўчастковай камісіі: арганізавалі галасаванне на першым паверсе – пажылыя людзі дзякуюць

У Магілёўскай вобласці прагаласаваць датэрмінова можна на 697 выбарчых участках. Тут створаныя неабходныя ўмовы, каб выбаршчыкі адчувалі сябе камфортна і бяспечна.

Так, на выбарчым участку № 112 Магілёва, які размяшчаецца на базе СШ № 6, датэрміновае галасаванне арганізавана на першым паверсе, практычна побач з уваходам. «Гэта вельмі зручна, асабліва для пажылых людзей, якія ўжо не раз дзякавалі нам за прадбачлівасць», – расказала намесніца старшыні ўчастковай камісіі горада Магілёва № 112 Ірына Аляхновіч.

Памяшканне для галасавання невялікае, але ўтульнае. Тут пастараліся максімальна арганізаваць бяспечнае, з пункту гледжання санітарных нормаў, знаходжанне выбаршчыкаў: ёсць разметка па выкананні дыстанцыі, дэзсродкі, штогадзіна апрацоўваецца кабінка.

Паводле слоў Ірыны Аляхновіч, выбарчая кампанія на ўчастку пачалася досыць актыўна. Жадаючыя прагаласаваць прыходзілі нават у панядзелак, але прыйшлося растлумачыць, што пакінуць свой голас за таго ці іншага кандыдата можна датэрмінова з 4 па 8 жніўня ўключна. «Зранку ідуць у асноўным пажылыя грамадзяне. Вечарам, пасля заканчэння працоўнага дня, людзей становіцца значна больш. Абстаноўка ціхая, спакойная».

У спісы выбаршчыкаў на ўчастку № 112 унесена 1586 чалавек. Ірына Аляхновіч удакладніла, што галасаванне ў асноўны дзень выбараў таксама арганізуюць на першым паверсе школы.