Больш за 3 тыс. старшакласнікаў Магілёўскай вобласці прынялі ўдзел у першым этапе рэспубліканскай алімпіяды па фінансавай граматнасці

Больш за 3 тыс. старшакласнікаў Магілёўскай вобласці з 283 устаноў адукацыі прынялі ўдзел у першым этапе рэспубліканскай алімпіяды па фінансавай граматнасці, які адбыўся ў верасні. Пра гэта карэспандэнту сайта паведамілі ў Галоўным упраўленні Нацыянальнага банка па Магілёўскай вобласці.

Дзецям былі прадстаўлены алімпіядныя заданні, якія ўключалі пытанні на веданне тэорыі аб наяўных грошах, зберажэннях, запазычаннях, лічбавым банкінгу, страхаванні, падаткаабкладанні, дзейнасці Нацыянальнага банка, а таксама матэматычныя задачы па фінансавай тэматыцы.

Удзельнікі годна справіліся з алімпіяднымі тэстамі, а чацвёра з іх паказалі найвышэйшы вынік, набраўшы па 100 балаў.

Пераможцы школьнага тура набылі «пуцёўкі» ў другі (раённы/гарадскі) этап алімпіяды, які адбудзецца 23 кастрычніка ў Магілёве, Бабруйску і ўсіх раённых цэнтрах вобласці.