З пачатку года праз парушэнне правілаў эксплуатацыі электраабсталявання ў Магілёўскай вобласці адбылося больш за 140 пажараў

За 9 месяцаў 2020 года праз парушэнне правілаў эксплуатацыі электраабсталявання ў Магілёўскай вобласці адбылося 145 пажараў. Пра гэта карэспандэнту сайта паведаміла старшы інспектар абласнога ўпраўлення МНС Вольга Нехарошых.

Апошняе здарэнне па такой прычыне зафіксавана вечарам 6 кастрычніка. 66-гадовая жыхарка в. Залесавічы Крычаўскага раёна адпачывала за праглядам тэлеперадач. Раптам экран згас і з тэлевізара паваліў густы дым. Жанчына, патэлефанаваўшы па нумары 101, паспяшалася эвакуявацца. Ратавальнікі аператыўна справіліся з узгараннем, не даўшы агню пашкодзіць жыллё. А вось тэлевізар прыйдзецца купляць новы.

«У пазбяганне НС, сыходзячы з хаты або укладваючыся спаць, прывучыце сябе выключаць электрапрыборы з сеткі, – падкрэсліла Вольга Нехарошых. – У пазбяганне ўзгарання праз скачкі напружання ў сетцы карыстайцеся сеткавымі фільтрамі. І нават пры іх наяўнасці перагружаць электрасетку – не самае лепшае рашэнне. Рэгулярна выдаляйце з задняй сценкі халадзільніка пыл. Электрапрыборы лепш ставіць далей ад лёгкаўзгаральных матэрыялаў. І памятайце: тэхніка не служыць стагоддзямі, у яе існуе тэрмін эксплуатацыі, па заканчэнні якога яна ператвараецца ў міну запаволенага дзеяння, якая ў любы момант можа справакаваць пажар».