Магілёў і Уладзівасток пашыраюць супрацоўніцтва

Шэраг пагадненняў аб супрацоўніцтве быў падпісаны прадстаўнікамі Прыморскага краю і Магілёўскай вобласці ва Уладзівастоку на мінулым тыдні. Беларускую дэлегацыю ўзначаліў старшыня аблвыканкама Леанід Заяц.

У яе склад таксама ўвайшлі прадстаўнікі буйных беларускіх машынабудаўнічых, будаўнічых і аграпрамысловых прадпрыемстваў. Па ключавых кірунках супрацоўніцтва прайшлі перамовы, якія завяршыліся падпісаннем двухбаковых пагадненняў.

Леанід Заяц і Алег Кажамяка падпісалі пратакол пасяджэння рабочай групы па супрацоўніцтве Магілёўшчыны і Прымор’я. Таксама быў падпісаны пратакол аб супрацоўніцтве паміж урадам Прыморскага краю і Міністэрствам прамысловасці Рэспублікі Беларусь. З беларускага боку дакумент падпісаў міністр прамысловасці Беларусі Пётр Пархомчык.

Старшыня Магілёўскага гарвыканкама Уладзімір Цумараў і кіраўнік адміністрацыі Уладзівастока Алег Гумянюк падпісалі пратакол аб намерах па ўсталяванні супрацоўніцтва паміж двума гарадамі.

Як расказаў Уладзімір Цумараў, нягледзячы на значную аддаленасць нашых рэгіёнаў, паміж Магілёвам і Прыморскім краем завязалася гандлёва-эканамічнае супрацоўніцтва. Так, па выніках дзевяці месяцаў гэтага года знешнегандлёвы абарот тавараў Магілёва і Прыморскага краю склаў 442,8 тыс. долараў, або 120,4% да аналагічнага перыяду мінулага года. Экспарт тавараў – 441,8 тыс. долараў. Найбольшым попытам у расіян карыстаюцца ліфты, малочная і жэлацінавых прадукцыя.

З падпісаннем пратакола Магілёў і Уладзівасток маюць намер усталяваць дружалюбныя сувязі не толькі ў гандлёва-эканамічнай дзейнасці, але і ў адукацыйнай, культурнай сферах, а таксама знайсці ўзаемныя інтарэсы ў развіцці спорту і турызму.

Разам з тым падчас візіту кіраўнікі прыморскіх гандлёвых сетак «Фреш25», «Реми» і «Самбери» падпісалі пагадненні аб намерах з беларускімі вытворцамі прадуктаў харчавання ААТ «Бабушкина крынка», ААТ «Чырвоны харчавік» і ААТ «Магілёўскі мясакамбінат».

«Мы дамовіліся, што пасля таго як беларускія тавары масава з’явяцца на паліцах нашых магазінаў, калегі правядуць шэраг рэкламных мерапрыемстваў, у тым ліку ў фармаце гарадскога свята «Дні Рэспублікі Беларусь у Прыморскім краі». У адказ мерапрыемствы плануем правесці ў Рэспубліцы Беларусь», – пракаментаваў намеснік старшыні ўрада рэгіёна Канстанцін Шастакоў.

Падчас візіту былі адзначаны важнасць падпісаных пагадненняў і чаканне ад іх адчувальных вынікаў. Каб падпісаныя пагадненні не засталіся на паперы, беларускі і расійскія бакі дамовіліся раз на квартал праводзіць зверку з мэтай зразумець, як ідзе праца па пагадненнях і ці атрымаецца па выніках наступнага года ўбачыць істотнае павелічэнне гандлёвага абароту.

Дарэчы, у верасні дэлегацыя Прыморскага краю на чале з губернатарам Алегам Кажамякам ужо наведвала Магілёў.

Павел Савельеў, vestnikmogileva.by