Высокатэхналагічная вытворчасць па выпуску ветпрэпаратаў з’явіцца ў Горках

Сучасная высокатэхналагічная вытворчасць па выпуску ветпрэпаратаў з’явіцца ў Горках. Пра гэта паведаміў выканальнік абавязкаў дырэктара Навукова-вытворчага цэнтра «БелАграГен» Аляксандр Валасач.

«Вытворчасць размесціцца на базе ўжо існуючых магутнасцей навукова-вытворчага цэнтра, – адзначыў кіраўнік. – Яна будзе адпавядаць міжнароднаму стандарту GMP, які вызначае высокія патрабаванні да выпуску лекавых прэпаратаў, БАДаў, харчовых дабавак і некаторых прадуктаў харчавання. Гэты сертыфікат якасці абавязвае прадпрыемствы-вытворцы выконваць шэраг спецыяльных арганізацыйных, тэхнічных і тэхналагічных мер, якія забяспечваюць належную тэхналогію і арганізацыю вытворчасці. Таксама дакумент гарантуе бяспеку прадукту і адпаведнасць свайму прызначэнню».

Новая структура размесціцца ў асобным мадэрнізаваным будынку, дзе размесцяцца некалькі ўчасткаў: вытворчы, аператыўнага складзіравання, упакоўкі і фасоўкі ў другасную ўпакоўку для спажыўца. Паралельна развіццё атрымае і навукова-вытворчая лабараторыя, якая забяспечыць кантроль якасці на кожным этапе выпуску ветпрэпаратаў – ад сыравіны і вытворчых умоў да выхаду гатовай прадукцыі.

«На адкрыццё новай вытворчасці выдзелена каля $2 млн, – удакладніў Аляксандр Валасач. – Пасля яго ўводу ў эксплуатацыю будзе створана 10 працоўных месцаў. Сёння ідзе працэс тэхнічнага перааснашчэння і закупкі новага абсталявання, прывядзенне дакументаў у адпаведнасць з міжнароднымі патрабаваннямі».

Навукова-вытворчы цэнтр «БелАграГен» з’яўляецца вядучым вытворцам і пастаўшчыком ветэрынарных прэпаратаў, прызначаных для лячэння і прафілактыкі захворванняў розных груп сельскагаспадарчых і хатніх жывёл. Кампаніяй зарэгістравана больш за 100 ветсродкаў, многія з якіх не маюць аналагаў на рынку Расіі і іншых краін СНД. Штомесяц да 70% прадукцыі прадпрыемства пастаўляецца на экспарт у краіны блізкага замежжа.

БЕЛТА