У ліку 26 шматабяцальных праектаў, вылучаных Нацыянальным агенцтвам інвестыцый і прыватызацыі, 6 з Магілёўскай вобласці

Спецыялісты Нацыянальнага агенцтва інвестыцый і прыватызацыі, прааналізаваўшы звыш тысячы інвестыцыйных праектаў з базы агенцтва, вылучылі 26 самых шматабяцальных прапаноў.

Паводле інфармацыі агенцтва, праекты ахопліваюць розныя галіны: дрэваапрацоўку, турызм, сельскую гаспадарку і перапрацоўку сельгаспрадукцыі, прамысловасць і іншыя.

Геаграфія праектаў уключае ў сябе ўсе рэгіёны Беларусі, у тым ліку Магілёўскую вобласць. З прапанаваных да рэалізацыі на тэрыторыі Магілёўшчыны інвестпраектаў спецыялісты агенцтва вылучылі 6 прапаноў. Гэта, у прыватнасці, вытворчасць рэгенерату – пластычнага матэрыялу, здольнага вулканізавацца і часткова замяніць каўчук ў складзе гумовых сумесяў у Бабруйску. Аналагі гэтага прадукту на дадзены момант у Беларусі адсутнічаюць. Яшчэ адзін перспектыўны праект – стварэнне лесапільнай вытворчасці ў тым жа Бабруйску. Для яе поспеху ёсць усе ўмовы: высокапрафесійная каманда, сыравіна, нядрэнная вытворчая пляцоўка. Інвестыцыі патрабуюцца для закупкі лініі лесапілавання, сушыльнага комплексу і тэхнікі. Трэці праект з горада на Бярэзіне звязаны з бабруйскім мясакамбінатам, які плануе будаўніцтва цэха па выпуску паўфабрыкатаў з мэтай павелічэння аб’ёмаў вытворчасці за кошт выпуску новай (інавацыйнай) прадукцыі.

А Хоцімскі райвыканкам падрыхтаваў праект па вытворчасці сельгаспрадукцыі на аснове прыроднай сыравіны (сапрапель, трэпел, торф). Праект актуальны, паколькі назіраецца падаражэнне мінеральных угнаенняў пры паралельным росце сусветнага попыту на арганічныя ўгнаенні. Яшчэ 2 праекты звязаны з «Магілёўхімвалакно». З улікам рынкавай кан’юнктуры хімічны гігант прапануе будаўніцтва ўстаноўкі па вытворчасці працірачных нятканых матэрыялаў прамысловага і бытавога прызначэння магутнасцю 5,5 тысячы тон на год. Гэтыя матэрыялы прыдатныя, у прыватнасці, для вытворчасці сурвэтак для медыцынскіх і касметалагічных мэтаў, сродкаў для догляду салона аўтамабіля і іншых вырабаў. Другі праект «Магілёўхімвалакно» – будаўніцтва і ўвод у эксплуатацыю дзвюх тэхналагічных ліній па вытворчасці іголкапрабіўных нятканых матэрыялаў, якія дазваляюць забяспечыць выпуск палатна ў аб’ёме 12 тысяч т. на год. У тым ліку плануецца выпуск палатна для аўтамабільнай прамысловасці, поліэфірнага фільтравальнага палатна, поліэфірнага абутковага палатна, геатэкстыльнага палатна для транспартнага будаўніцтва, тэхнічных лямцоў.

mogilevnews.by