«Астанкі пахаваюць на нашай зямлі ці перададуць родным». Пошукавікі ўстанаўліваюць імёны ахвяр ВАВ

Рукамі пошукавікаў гісторыка-патрыятычнага клуба « Віккру» былі паднятыя з зямлі астанкі больш за 1,6 тыс. ахвяр Вялікай Айчыннай вайны, пахаваных на тэрыторыі Магілёўскай вобласці. Аб выніках дзейнасці клуба ў Год гістарычнай памяці ў праекце «Краіна гаворыць» на YouTube-канале БЕЛТА расказала намеснік старшыні грамадскага аб’яднання «Магілёўскі абласны гісторыка-патрыятычны пошукавы клуб “Віккру”» Ала Казючыц.

Клуб «Віккру» існуе ўжо больш за 28 гадоў, з 1994 года. Яго заснаваў ваенны гісторык і пісьменнік Мікалай Барысенка, які да гэтага часу кіруе клубам. Ваенна-патрыятычная і гістарычная тэматыка не новыя для клуба. «Мы займаемся гэтай тэмай пастаянна, але, вядома, у Год гістарычнай памяці ў нас атрымалася правесці трохі больш і пошукавых экспедыцый, і грамадскай працы, і разнастайных выстаў, і сустрэч рознага ўзроўню. У прынцыпе, мы гэтай працай займаемся пастаянна», – заўважыла Ала Казючыц.

Як падкрэсліла намеснік старшыні аб’яднання, за час існавання клуба яго ўдзельнікі аднавілі з архіўных дакументаў 26,5 тыс. імёнаў безыменных. Рукамі пошукавікаў клуба былі паднятыя з зямлі астанкі 1614 чалавек, з якіх на даны момант устаноўлены імёны 124 чалавек.

«Кожны год мы праводзім пошукавыя экспедыцыі на мясцовасці. Гэта традыцыйна экспедыцыі ў Быхаўскі, Слаўгарадскі, Чавускі, Асіповіцкі, Шклоўскі, Дрыбінскі раён. На жаль, мы пакуль не ахопліваем усю Магілёўскую вобласць цалкам, але, тым не менш, ужо аб’ехалі большую частку тэрыторыі. У верасні скончылася наша крайняя экспедыцыя ў гэтым годзе «Сожскі рубеж – 2022», – расказвае Ала Казючыц.

Яна адзначыла, што ў выніку экспедыцыі былі ўзнятыя астанкі 21 ахвяры ВАВ і знойдзена дзесяць медальёнаў, з дапамогай якіх можна ўстанавіць асобу забітых. «Пакуль прачытана чатыры медальёны, праца па ўстанаўленні асобы вядзецца. Нашы хлопцы ўжо шукаюць сваякоў, і вырашаецца пытанне, ці будуць гэтыя астанкі пахаваныя на нашай зямлі або іх будуць перадаваць сваякам», – паведаміла Ала Казючыц.

Праект створаны за кошт сродкаў мэтавага збору на вытворчасць нацыянальнага кантэнту.

БЕЛТА