Будучая ўступная кампанія, падрыхтоўка кадраў: Леанід Мартынюк сустрэўся з выкладчыкамі ў Горках

Пытанні будучай уступнай кампаніі, якасці падрыхтоўкі педагагічных кадраў і замацавання маладых спецыялістаў на месцах сталі асноўнымі падчас сустрэчы памочніка Прэзідэнта – інспектара па Магілёўскай вобласці Леаніда Мартынюка з прафесарска-выкладчыцкім складам Беларускай дзяржаўнай сельскагаспадарчай акадэміі і прадстаўнікамі іншых устаноў адукацыі горада Горкі.

«Не выпадкова напярэдадні 1 верасня мы вырашылі правесці інфармацыйную сустрэчу менавіта з прафесарска-выкладчыцкім складам, з дырэктарамі гарадскіх школ. Гэта трэба для таго, каб абмеркаваць тую праблематыку, якая можа паўстаць у маючым адбыцца перыядзе з пэўнымі зменамі пры правядзенні экзаменаў, пры падрыхтоўцы да іх. Каб разам у фармаце канструктыўнага дыялогу вызначыць найбольш праблемныя пытанні і пастарацца выпрацаваць для іх шляхі вырашэння», – адзначыў памочнік Прэзідэнта – інспектар па Магілёўскай вобласці.

Падчас сустрэчы дырэктар гімназіі № 1 Горак Сяргей Пруднікаў закрануў актуальнае для многіх пытанне: што будзе чакаць выпускнікоў у наступным годзе і да чаго ім рыхтавацца. «Мне задаюць гэтыя пытанні і бацькі, і школьнікі, бо зараз яшчэ не вызначаны дакладныя ўмовы ўступных іспытаў, – сказаў ён. – Многія з іх ўспамінаюць іншы эксперымент – пераход з 12-гадовай сістэмы адукацыі на 11-гадовую. Тады школьнікам прыйшлося наганяць вучэбную праграму ўсяго за паўгода, а гэта вялікі стрэс».

Сяргей Пруднікаў таксама адзначыў, што любому школьніку, а тым больш выпускніку, неабходна бачыць перспектывы. Ён прывёў словы Аляксандра Лукашэнкі, сказаныя на нарадзе па развіцці сферы адукацыі. «Прэзідэнт тады сказаў, што трэба вельмі ўважліва падумаць, якое правільнае рашэнне прыняць па адзіным экзамене», – падкрэсліў ён.

Памочнік Прэзідэнта – інспектар па Магілёўскай вобласці – адзначыў, што для дэталёвай прапрацоўкі гэтых пытанняў ёсць дакладна ўстаноўленыя тэрміны. «За гэты час трэба ўсё прааналізаваць. Збірайце інфармацыю ад вучняў, іх бацькоў, педагогаў. Вы дакладна адзначылі, што вучань павінен бачыць перспектыву і быць у ёй упэўнены. Таму і трэба прыняць правільнае рашэнне», – адзначыў Леанід Мартынюк.

Дырэктар гімназіі № 1 у сваю чаргу падкрэсліў, што цэнтралізаванае тэсціраванне – гэта сістэма, да якой доўга ішлі. У такой форме экзаменаў ёсць цэлы шэраг плюсаў, але маецца і негатыўны момант. Пры такой форме іспыту будучыя выкладчыкі не бачаць асобу самога абітурыента.

Яшчэ адно пытанне, на якім завастрыў увагу дырэктар Горацкай гімназіі, – падрыхтоўка педагагічных кадраў. Ён адзначыў, што праца настаўніка ці выкладчыка страціла свой высокі статус у вачах моладзі. У якасці прыкладу ён прывёў педагагічныя класы. Па словах Сяргея Пруднікава, толькі палова выпускнікоў такіх класаў выбірае профільныя ВНУ. І гэта таксама праблема, над якой трэба папрацаваць.

Адной з тэм для абмеркавання стала арэнднае жыллё. Леанід Мартынюк падкрэсліў, што для замацавання кадраў, асабліва ў невялікіх населеных пунктах, патрэбна магчымасць у наступным выкупіць гэтае жыллё ў дзяржавы. «Так і дзяржава нічога не губляе, і чалавек на месцы застаецца. Ёсць жыллё – можна жыць і працаваць, заводзіць сям’ю. За гэтым механізмам, безумоўна, будучыня, – адзначыў памочнік Прэзідэнта. – Але іншае пытанне, што не ўсе наяўныя кватэры ў нармальным стане, многія патрабуюць рамонту. Пытанне і з будаўніцтвам новых кватэр. Нашы прадпрыемствы павінны больш актыўна ўключацца ў гэты працэс».

Акрамя гэтага, падчас сустрэчы Леанід Мартынюк расказаў прысутным аб выніках працы Магілёўскай вобласці ў першым паўгоддзі, аб бягучай эканамічнай сітуацыі і працы прадпрыемстваў і арганізацый рэгіёна ва ўмовах санкцыйнага ціску.

БЕЛТА