Другую частку кнігі «Вялікая Айчынная вайна: сямейныя гісторыі» выдалі ў Магілёве

Другую частку кнігі «Вялікая Айчынная вайна: сямейныя гісторыі» выдалі ў Магілёве. Пра гэта расказаў старшыня гарадскога Савета дэпутатаў Максім Гурын.

У другую частку кнігі ўвайшлі каля 500 біяграфій, 3 тыс. архіўных дакументаў і фатаграфій, якія захоўваліся ў сем’ях. Многія з іх апублікаваныя ўпершыню. «Галоўная ідэя нашай працы засталася нязменнай: мы хацелі расказаць гісторыі простых людзей, якія набліжалі Вялікую Перамогу. Адной з умоў першай часткі зборніка сталі гісторыі магілёўцаў, іх родных і блізкіх. А другая частка кнігі пашырыла сваю геаграфію: у зборнік трапілі гісторыі жыхароў з усёй Магілёўскай вобласці», – адзначыў Максім Гурын.

Ідэя стварыць такую кнігу з’явілася ў дэпутатаў Галіны Бяляевай і Максіма Гурына. Галіна Бяляева адзначыла, што лісты з біяграфіямі родных прыходзілі з розных куткоў Беларусі, Чэхіі, Ізраіля і Расіі. Усе, хто звярнуўся, выхадцы з Беларусі, чые продкі прымалі ўдзел у Вялікай Айчыннай вайне.

Пры складанні першай кнігі аўтары звярталіся ва ўстановы адукацыі. «Нам хацелася, каб дзеці больш даведаліся пра сваіх родных, якія сыходзілі на фронт, былі партызанамі або падпольшчыкамі, працавалі ў тыле. І мы атрымалі вялікі водгук ад магілёўскіх школьнікаў і іх сем’яў, – адзначыў Максім Гурын. – Але па меры фарміравання зборніка да нас стала звяртацца ўсё больш гараджан, якія таксама хацелі, каб гісторыі іх сваякоў былі ўключаныя ў кнігу. Падчас працы над першай часткай зборніка стала зразумела, што ў кнігі будзе працяг. Таму мы звярнуліся ва ўстановы адукацыі і музеі ва ўсіх кутках Магілёўскай вобласці. У гэтай працы нам дапамог інстытут развіцця адукацыі. Усе з натхненнем адгукнуліся на нашу прапанову, а гэта гаворыць аб тым, што наш народ памятае і шануе подзвіг продкаў, беражліва захоўвае ў сваіх сем’ях гісторыю Вялікай Айчыннай вайны і ганарыцца сваім гераічным мінулым».

Як расказала Галіна Бяляева, праца над другой часткай кнігі ішла каля 9 месяцаў. Зборнікі будуць перададзены ва ўстановы адукацыі і музеі рэгіёна. «Складаць такія зборнікі цяжка. І не толькі таму, што кожную гісторыю прапускаеш праз сябе. Кожную біяграфію я дэталёва правярала, таму што з цягам часу нейкія факты забываліся. Яшчэ былі цікавыя сітуацыі, калі біяграфію аднаго і таго ж чалавека дасылалі дзве розныя сям’і. І аказвалася, што гэта галінкі аднаго сямейнага дрэва, якія ведалі адзін пра аднаго, але згубіліся. Так атрымлівалася, што памяць аб мінулым з’яднала пакаленні. Акрамя гэтага, сваякі часта прывозяць цэлыя сшыткі з успамінамі сваіх родных, якія перажылі вайну, наладжвалі жыццё пасля яе, – расказала яна. – Наша галоўная мэта – напісаць не толькі аб ваенных, але і ў цэлым аб пакаленні тых людзей, што перажылі вайну. Бо кожны з іх герой: хлапчук, што пайшоў на фронт, маці, якая адна ратавала сваіх дзяцей, пакуль муж ваяваў, дзеці, што перажылі блакаду Ленінграда і ўсімі сіламі імкнуліся выратаваць не толькі сябе і сваіх родных, але і людзей побач. І аб кожным мы хочам расказаць. Гэта наша памяць, наша гісторыя».

Па словах Максіма Гурына, кнігу будуць дарыць і ветэранам, якія жывуць і гісторыі якіх трапілі ў другую частку зборніка. «Мы прыязджаем у госці, дорым кнігі, размаўляем. І такія сустрэчы заўсёды пакідаюць добрыя эмоцыі. А ветэраны бачаць, што сённяшняе пакаленне памятае, любіць іх і ганарыцца імі», – падкрэсліў ён.

Магілёўскія дэпутаты плануюць пачаць працу над трэцяй часткай зборніка. «А таму тыя жыхары Магілёўскай вобласці, якія хацелі даслаць нам гісторыю сваіх блізкіх, але з нейкіх прычын не паспелі, могуць яе дасылаць. І пакуль людзям ёсць аб чым расказаць, мы будзем працягваць працаваць», – падсумавала Галіна Бяляева.

БЕЛТА