«Магілёўліфтмаш» плануе распрацаваць ліфт з хуткасцю 4 метры за секунду

ААТ «Магілёўліфтмаш» плануе распрацаваць ліфт з хуткасцю руху 4 метры за секунду. Аб гэтым заявіў намеснік галоўнага інжынера прадпрыемства Юрый Чарнагрэбель у YouTube-праекце БЕЛТА «Па факце: рашэння Першага».

Юрый Чарнагрэбель адзначыў, што «Магілёўліфтмаш» - гэта прадпрыемства, якое дынамічна развіваецца і дасягненні якога ўзнімаюць узровень беларускай прамысловасці ў цэлым. Паводле яго слоў, завод засяроджаны на бесперапыннай мадэрнізацыі вытворчасці, удасканаленні канструкцыі ліфтаў і задавальненні спажывецкага попыту.

«Паказчык, які для нас вельмі важны ў плане мадэрнізацыі, - гэта інвестыцыі ў асноўны капітал на ўзроўні не менш як 135% у будучым годзе», - адзначыў намеснік галоўнага інжынера.

На чым жа засяроджанае зараз прадпрыемства? На «Магілёўліфтмашы» рэалізуюцца тры інвестыцыйныя праекты. Так, на заводзе ствараецца новая сучасная вытворчасць цягавых электрарухавікоў, якія прымяняюцца для тралейбусаў, электробусаў. Асноўныя спажыўцы - МАЗ, «БКМ Холдынг». Выраблены доследныя ўзоры электрычных рухавікоў з вадзяным астуджэннем для МАЗа.

Таксама рыхтуецца вялікі праект на 2024-2026 гады па мадэрнізацыі і стварэнні вытворчасці ліфтаў на базе безрэдуктарнага прывада. На прадпрыемстве ўпэўнены, што за гэтым вялікія перспектывы і будучыня.

«У наш час большасць нашых ліфтаў камплектуецца рэдуктарнымі прывадамі. Безрэдуктарныя прывады набываюцца ў замежных пастаўшчыкоў. Таму ёсць два перспектыўныя праекты, якія разгледжаны ведамаснай экспертызай і дапушчаны да рэалізацыі. Гэта мадэрнізацыя дзеючай вытворчасці па выпуску імпартазамяшчальных ліфтаў і арганізацыя вытворчасці ліфтаў з хуткасцю руху кабіны да 2,5 метра за секунду з энергаэфектыўнымі безрэдуктарнымі прывадамі. Але гэта не мяжа, і ўжо пастаўлена задача перад навукова-тэхнічным цэнтрам у наступным годзе распрацаваць і правесці выпрабаванні ліфта з хуткасцю руху да 4 метраў за секунду. 4 метры за секунду - гэта больш прэстыж. Ёсць ліфты з хуткасцю руху 8 і нават 9 метраў за секунду. Але мы лічым, што для нас дадзены сегмент не актуальны», - распавёў Юры Чарнагрэбель.

Цяпер вытворчая праграма «Магілёўліфтмаша» налічвае каля 180 базавых мадэлей ліфтаў: пасажырскія, грузавыя, бальнічныя, катэджныя ліфты рознай грузападымальнасці. Акрамя ліфтаў на прадпрыемстве выпускаюцца пад'ёмнікі для фізічна аслабленых асоб, эскалатары і травалатары, будаўнічыя пад'ёмнікі і здрабняльнікі драбналесся (мульчыроўшчыкі), а таксама спажывецкія тавары.

У 2021 годзе на прадпрыемстве было выраблена 11850 ліфтаў, у 2022-м - 12484. Па выніках гэтага года прадпрыемства мае намер выпусціць 13 тыс. ліфтаў.

«За мінулы год «Магілёўліфтмаш» прадаў больш ліфтаў, чым хтосьці з вытворцаў постсавецкага лагера. А гэта гаворыць аб многім. Гэта значыць, што мы вырабляем не проста прыдатны прадукт, не проста канкурэнтаздольны. Ён жадаем, яго жадаюць бачыць, яго купляюць. Ён патрэбны, ён карыстаецца попытам», - падкрэсліў намеснік галоўнага інжынера.

«Перыяд быў цяжкі». Завадчане распавялі аб першым візіце Лукашэнкі на «Магілёўліфтмаш»