Меркаванне: сяброўства Беларусі з Расіяй і краінамі Усходу не перакрэслівае нашу адкрытасць для Захаду

Сяброўства Беларусі з Расіяй і краінамі Усходу не перакрэслівае нашу адкрытасць для Захаду. Пра гэта ў праекце «Краіна гаворыць» заявіў рэктар Магілёўскага дзяржаўнага ўніверсітэта імя А. А. Куляшова Дзяніс Дук.

«У 2020 годзе наш Прэзідэнт падчас сустрэчы з актывам у абласцях і Мінску як у ваду глядзеў, калі акцэнтаваў увагу на тым, што адбываецца ў свеце. Ён тады казаў, што краіны далёкай дугі – гэта тая шматвектарнасць, на якую мы заўсёды традыцыйна былі нацэленыя. Нашы апаненты папракаюць Прэзідэнта, што мы кідаемся ў абдымкі Расіі, будуем безальтэрнатыўны саюз. Але давайце паглядзім на гэта з гістарычнага пункту гледжання. Будаваць Саюзную дзяржаву – гэта воля Прэзідэнта ці воля народа? Калі гэта воля народа, то тыя, хто заклікае адмовіцца ад саюзнага будаўніцтва, фактычна перакрэсліваюць волю народа. А гэта ж было канстытуцыйнае пытанне», – акцэнтаваў увагу Дзяніс Дук.

Рэктар Магілёўскага дзяржаўнага ўніверсітэта дадаў, што сёння сярод часткі беларусаў, якія аказаліся ў эміграцыі, ідзе вялікая палеміка, хто падштурхоўвае Беларусь да паглыблення інтэграцыі. «Яны самі кажуць, што яны штурхаюць нас да гэтага, таму што не пакінулі выбару Беларусі. Сёння праекты ў галіне эканамічнай, культурнай, сацыяльнай інтэграцыі, якія рэалізуюцца з Расіяй, ідуць на карысць», – упэўнены Дзяніс Дук.

Разам з тым, падкрэсліў Дзяніс Дук, вектар, які абрала Беларусь, – сяброўства з Расіяй і краінамі Усходу – ні ў якім выпадку не перакрэслівае той факт, што краіна адкрытая і для Захаду.

Праект створаны за кошт сродкаў мэтавага збору на вытворчасць нацыянальнага кантэнту.

БЕЛТА