Толькі сумеснымі намаганнямі мы зможам захаваць нашу незалежную і суверэнную дзяржаву – Наталля Хандалава

Аб'ядноўваць і дасягаць

Аб самых важных працэсах, якія адбываюцца ў грамадстве, і знакавых чаканых падзеях мы гутарым з кіраўніком раённага цэнтра па забеспячэнні дзейнасці бюджэтных арганізацый і дзяржаўных органаў Мсціслаўскага раёна, лідэрам Мсціслаўскага раённага аддзялення Беларускай партыі «Белая Русь», намеснікам старшыні раённага аддзялення РГА «Белая Русь» Наталляй Хандалавай.

Такой камандзе ўсё пад сілу

- Наталля Уладзіміраўна, у апошні час роля партыі «Белая Русь» істотна ўзрасла: многія аднапартыйцы абраныя дэпутатамі розных узроўняў, дэлегатамі ВНС. Як, па-вашаму, гэта адаб'ецца на працэсах, якія адбываюцца ў грамадстве?

- Прывяду ў прыклад наш Мсціслаўскі раён, дзе абрана 12 аднапартыйцаў у сельскія рады, а таксама чацвёра - у раённы Савет дэпутатаў. Пры гэтым старшыня раённай Рады дэпутатаў Алена Клеенкава — член рады нашага аддзялення партыі. Такая каманда, безумоўна, здольна ўплываць на многія працэсы, якія адбываюцца на нашай тэрыторыі.

Сёння самае галоўнае, чаго хочуць людзі, - гэта мір, спакой і ўпэўненасць у заўтрашнім дні. І для нашай партыі гэта таксама першарадныя каштоўнасці. Мы не баімся адпускаць дзяцей гуляць, не баімся ўвечар хадзіць па вуліцах. Гэта палітыка нашай дзяржавы.

— Вы з актывістамі шмат робіце для паляпшэння жыцця людзей, займаецеся патрыятычным выхаваннем моладзі. Якія праекты ўжо рэалізаваны, якія нядаўна пачаліся?

- У нашым раёне наладжана ўзаемадзеянне партыі і грамадскага аб'яднання, бо ўсе мы адтуль. Нашы сумесныя праекты - шэфства над гульнявымі пляцоўкамі ў аграгарадках Мішні і Андраны. Акрамя таго, за кошт сяброўскіх унёскаў мы фінансавалі выраб рэкламных матэрыялаў да мінулай электаральнай кампаніі. Таксама не засталіся ў баку ад акцыі «Нашы дзеці» - набывалі падарункі для пераможцаў алімпіяд. Падтрымалі гуманітарны праект «Дзецям Данбаса».

А днямі прыступілі да рэалізацыі акцыі «Мы павінны ім памяць», прысвечанай 80-годдзю вызвалення Беларусі ад нямецка-фашысцкіх захопнікаў. Гэта буйны маштабны праект па ўшанаванні памяці герояў, якія змагаліся за Вялікую Перамогу. У ім будуць удзельнічаць аднапартыйцы і іх дзеці.

З людзьмі трэба стала працаваць

- Наколькі актыўна жыхары Мсціслаўскага раёна працягваюць папаўняць шэрагі партыі, ці шмат сярод іх моладзі?

- Калі пры стварэнні нашага аддзялення ў ёй складаліся 164 чалавекі, то сёння - 349. Але гэта не адбываецца само па сабе, патрабуецца вялікая тлумачальная праца сярод насельніцтва. Людзі павінны ведаць і разумець, дзеля чаго створана партыя і чым яна займаецца.

А моладзі ў нашым аддзяленні 60 чалавек. Лічу, гэта нямала, усё ж мы не моладзевая арганізацыя і радыя бачыць у сваіх шэрагах людзей любога ўзросту, галоўнае, каб гэта былі нашыя аднадумцы. З іншага боку, такая колькасць аднапартыйцаў - далёка не мяжа. Мы працягнем і надалей наведваць працоўныя калектывы, і спадзяюся, што нашыя шэрагі будуць расці.

- Калі вы самі пачалі займацца грамадскай працай?

- Яшчэ ў школе заўсёды была актывісткай: удзельнічала ў мастацкай самадзейнасці, конкурсах, малявала плакаты, гуляла ў камандзе КВЗ. Нярэдка выступала ініцыятарам розных мерапрыемстваў. Затым, прыйшоўшы на сваё першае працоўнае месца галоўным бухгалтарам у школу-інтэрнат для дзяцей з парушэннямі слыху ў 2009 годзе, адной з першых у раёне ўступіла ў РГА «Белая Русь», удзельнічала ва ўсіх яго акцыях. А калі перайшла на цяперашнюю працу, мяне вылучылі на пасаду намесніка старшыні раённага аддзялення РГА «Белая Русь», якую займаю і сёння, сумяшчаючы з кіраўніцтвам раённым аддзяленнем партыі.

- Вы адной з першых уступілі ў партыю?

- Праца намеснікам старшыні Мсціслаўскага раённага аддзялення РГА «Белая Русь» на працягу трох гадоў дазволіла мне атрымаць вопыт, які вельмі дапамагае ў рэалізацыі сацыяльных праектаў. І калі паўстала пытанне аб стварэнні партыі, не толькі я, але і ўсе нашыя актывісты напісалі заявы. Сумневаў не было, ды і быць не магло. Бо ля вытокаў стварэння партыі стаялі вельмі вядомыя аўтарытэтныя людзі - кіраўнік РГА «Белая Русь» Алег Раманаў, а ў Магілёўскай вобласці - Максім Гурын, які пасля ўзначаліў абласное аддзяленне. Ужо на момант станаўлення партыі было відавочна, што яе кіраўніцтва, апроч удзелу ў электаральных кампаніях, працягне ініцыяваць сацыяльныя праекты, накіраваныя на паляпшэнне жыцця кожнага чалавека. І мне, маім аднадумцам гэта вельмі блізка.

У ТЭМУ

- На сваёй асноўнай працы вы займаецеся забеспячэннем дзейнасці дзяржаўных устаноў - гэта і падвоз дзяцей у школу, і арганізацыя вольнага часу жыхароў раёна. Хацелася б даведацца пра гэта падрабязней.

- Наш цэнтр забяспечвае дзейнасць 37 бюджэтных арганізацый: школ, клубаў, сельсаветаў, дзіцячай спартыўнай школы і іншых. Вядзем бухгалтарскі ўлік у гэтых арганізацыях, ажыццяўляем працэдуру закупак, займаемся пытаннямі бягучых і капітальных рамонтаў, падвозам навучэнцаў і арганізацыяй іх харчавання. Працы ў нас заўсёды вельмі шмат. У прыватнасці, мы ўдзельнічалі ў пілотным праекце, звязаным з навацыямі ў школьным харчаванні. Рабяты з задавальненнем прынялі тое, што мы правялі анкетаванне не толькі сярод іх, але і апыталі іх бацькоў, улічылі смакавыя перавагі вучняў і толькі пасля гэтага падрыхтавалі і зацвердзілі меню. Цяпер такое харчаванне арганізавана практычна ва ўсіх школах нашага раёна.

Планы на будучыню

«Працягваецца вялікі электаральны цыкл. Мы стаім на парозе найважнейшай падзеі 2025 года - прэзідэнцкіх выбараў, таму ўсе нашы справы, вялікія і маленькія, накіруем на кансалідацыю грамадства. Будзем падтрымліваць ініцыятывы нашых грамадзян па захаванні гістарычнай памяці, добраўпарадкаванні помнікаў і пахаванняў, прапагандзе сямейных каштоўнасцей.

Выбудуем сваю працу з іншымі грамадскімі аб'яднаннямі - бо толькі сумеснымі намаганнямі мы зможам захаваць нашу суверэнную дзяржаву.

А на асноўнай працы найбліжэйшым часам плануем паехаць на экскурсію ў Брэст, таму што людзі павінны не толькі працаваць, але і адпачываць. Прычым гэта будзе не проста адпачынак, а больш глыбокае спазнанне нашай гісторыі, так што мы правядзем свой вольны час з карысцю, атрымаем новыя веды і ўражанні», - кажа Наталля Хандалова.

ДОСЬЕ «НГ»

Наталля Хандалава нарадзілася ў пасёлку Аўсянка Горацкага раёна, скончыла Расійскі аграрны ўніверсітэт па спецыяльнасці «Эканаміст-менеджэр». Працуючы галоўным бухгалтарам у школе-інтэрнаце, была ўзнагароджана Ганаровай граматай раённага Савета дэпутатаў, а летась Мсціслаўскі райвыканкам уручыў узначаленаму ёй калектыву падзячны ліст за актыўны ўдзел у добраўпарадкаванні горада.

 СБ