У Дрыбінскім раёне паспяхова развіваецца прадпрыемства лёгкай прамысловасці

Арыентацыя - экспарт

СКАЗАНА

Прэзідэнт Беларусі Аляксандр Лукашэнка:

- Крызіс - гэта цяжка, цяжка, але гэта шанец, гэта магчымасць. І найперш для лёгкай прамысловасці. У нас жа ёсць усё. Тканіны ёсць, швейныя машыны ёсць, кваліфікаваны персанал - і тэхнолагі, і кіраўнікі, і швачкі, і іншыя, хто вяжа і яшчэ нешта робіць, - у нас усё ёсць. Таму ўсё залежыць ад нас, як мы разгорнемся. (Падчас дакладу аб сітуацыі ў галіне старшыні канцэрна «Беллегпрам», 27 кастрычніка 2022 года)

Калі зачыняюцца адны дзверы, адчыняюцца іншыя. Санкцыйны ціск даў новыя шанцы для прадпрыемстваў лёгкай прамысловасці нашай краіны, у тым ліку па пастаўках на знешні рынак. Час магчымасцей - так Прэзідэнт назваў санкцыйны перыяд для лёгкай прамысловасці Беларусі, прымаючы з дакладам аб сітуацыі ў галіне старшыні канцэрна «Беллегпрам» у канцы 2022-га. І скарыстацца імі імкнуцца не толькі вядомыя гіганты лёгпрама, але і прадпрыемствы, якія працуюць у глыбінцы.

Паказальны прыклад. Дрыбінскі раён не першы год дэманструе пазітыўныя паказчыкі па аб'ёме экспарту, аднак у 2023-м вынікі асабліва заўважныя. За дзевяць месяцаў аб'ём экспарту склаў 952,2 тысячы долараў, ці 275 працэнтаў да аналагічнага перыяду мінулага года пры даведзеным паказчыку 166 працэнтаў. Значная заслуга ў гэтым ТАА «Агуна Плацінум», які працуе на тэрыторыі раёна.

Паводле звестак аддзела эканомікі Дрыбінскага райвыканкама, аб'ём экспарту гэтага прадпрыемства за дзевяць месяцаў склаў 804,6 тысячы долараў, за аналагічны перыяд 2022-га — 108,7 тысячы долараў. Гэта значыць, да ўзроўню мінулага года гэты паказчык вырас у 7,4 раза.

Удзельная вага экспарту прадпрыемства ў агульным аб'ёме Дрыбінскага раёна склала 84,5 працэнта. Карэспандэнты «Р» вывучылі галоўныя фактары паспяховага развіцця ТАА «Агуна Плацінум».

Крок за крокам

Адкрываючы швейную вытворчасць у канцы 2017 года, заснавальнік ТАА «Агуна Плацінум» магіляўчанка Ірына Шашкова не выпадкова выбрала Дрыбінскі раён: тут жылі яе дзядуля з бабуляй, у гэтых маляўнічых мясцінах прайшло яе дзяцінства — прыязджала сюды падчас школьных канікулаў, праводзіла тут выхадныя. Да раёна прыкіпела душой, заўсёды была яго патрыётам і хацела, каб жыццё тут рабілася яшчэ больш камфортным, рос дабрабыт мясцовых жыхароў, ва ўсіх была работа з дастойнай аплатай.

Пачыналася ўсё з маленькага дружнага калектыву, а зараз на прадпрыемстве працуе каля 100 чалавек, у Дрыбіне і Магілёве працуюць чатыры вытворчасці. Усё спецадзенне, рабочае адзенне, якое тут выпускаюць з давальніцкай сыравіны, ідзе толькі на экспарт.

Уладальніца бізнэсу Ірына Шашкова прыгадвае:

— Калі толькі адчыніліся, паехала ў Расію ў надзеі атрымаць першую замову, і мне атрымалася пераканаць кіраўніка аднаго з прадпрыемстваў, што мы здолеем у абумоўленыя тэрміны выпусціць прадукцыю, якая адказвае ўсім патрабаванням спажыўца. Мне паверылі, далі лякалы, па якіх пашылі з матэрыялу замоўца першую партыю працоўнага адзення. Заказ быў выкананы своечасова, партнёру спадабаўся наш падыход да справы. А далей спрацавала сарафаннае радыё: у дзелавым свеце хутка заваёўвалі аўтарытэт. Цяпер ужо не мы «палюем» за заказчыкамі, а яны стаяць да нас у чарзе. І зараз некалькі новых партнёраў пажадалі з намі працаваць.

Кіраўніцтва кампаніі не спынілася на дасягнутым. Па-ранейшаму ўзнікаюць і ўмацоўваюцца новыя дзелавыя сувязі, будуюцца планы на будучыню. Прадукцыя беларускага прадпрыемства, пашытая на заказ з давальніцкай сыравіны, сёння вядома ў многіх кутках неабсяжнай Расіі — і ў прыгранічных Бранскай і Смаленскай абласцях, і ў Маскве, і на Крайняй Поўначы, і на Далёкім Усходзе.

Прадпрыемства не раз станавілася пераможцам штогадовага спаборніцтва сярод экспарцёраў Дрыбінскага раёна, мае граматы і падзякі Магілёўскага аблвыканкама.

Складаемыя поспеху

Дырэктар прадпрыемства Алена Іванова падкрэслівае: каб заваяваць давер партнёраў, трэба заўсёды выконваць сваю работу якасна. Гэта галоўнае.

Што тычыцца швачак, сюды бяруць не толькі выпускніц каледжаў, якія атрымалі адпаведную спецыяльнасць. Нярэдка прыходзяць і таленавітыя самавукі, майстэрства якіх даводзяць да дасканаласці тутэйшыя тэхнолагі. У планах кіраўніцтва - на пастаяннай аснове навучаць персанал на ўласных вытворчых пляцоўках па скарочанай праграме, бо фірма расце, развіваецца, швачак не хапае.

Каб прадукцыя радавала партнёраў якасцю, на вытворчасцях не спыняецца мадэрнізацыя: пастаянна закупляецца высокатэхналагічнае абсталяванне.

У 2024 годзе плануецца адкрываць новыя вытворчасці ў Брэсцкай і Гродзенскай абласцях. Прайшлі перагаворы з партнёрамі з Узбекістана, дзе лёгкая прамысловасць добра развіта. Там таксама намечана адкрыць вытворчы ўчастак, каб яшчэ больш пашырыць экспарт.

Бываючы за межамі краіны, Ірына Шашкова часта знаходзіць пацверджанне таму, што ў іншых дзяржавах давяраюць нашай якасці. І ёй, патрыёту сваёй Радзімы, чуць гэта заўжды прыемна.

Чалавечы фактар

Кіраўніцтва ТАА «Агуна Плацінум» заўсёды памятае: каб людзі працавалі добрасумленна, шанавалі працоўнае месца, да іх трэба ставіцца з клопатам. На прадпрыемстве дастойныя ўмовы працы, высокі заробак, іншагароднім даюць інтэрнат. Поспехі найлепшых супрацоўнікаў заўсёды заўважаюць, а гэта дадатковы стымул.

Швачкі Анжаліка Башарына і Вольга Лахтырова кажуць:

- Мы прыходзім сюды, як да сябе дадому, калектыў у нас дружны. Праца цікавая, разнастайная, бо даводзіцца выконваць самыя розныя замовы.

Ірына Шашкова ўдзячна кіраўніку дзяржавы за ўсебаковую падтрымку жаночага прадпрымальніцтва, стварэнне для суайчынніц спрыяльных умоў вядзення бізнесу. У прыватнасці, у жанчын-заснавальнікаў прадпрыемстваў ёсць права атрымаць крэдыт у банку для пакупкі абсталявання на льготных умовах. Ствараюцца жаночыя бізнес-саюзы, праводзяцца бізнес-канферэнцыі, дзе заўсёды можна сустрэць аднадумак, абмяняцца вопытам, атрымаць падтрымку. На думку заснавальніка таварыства з абмежаванай адказнасцю, прадстаўніцы слабага полу часта ідуць на рызыку, але пры гэтым, як правіла, выйграюць. Мусіць, інтуітыўна адчуваюць, якая ідэя можа прывесці да поспеху.

Нягледзячы на тое, што працаваць даводзіцца практычна без выхадных і свят, Ірыне Шашковай падабаецца тое, чым яна займаецца. Прыемна ўсведамляць, што намаганні не марныя, тваімі намаганнямі ствараюцца новыя высокатэхналагічныя вытворчасці з дастойнымі ўмовамі працы, пастаянна пашыраюцца рынкі збыту.

На 2024 год у калектыва створанага ёю прадпрыемства грандыёзныя планы: прадоўжыць умацоўваць матэрыяльную базу, адкрыць новыя вытворчыя пляцоўкі, у тым ліку за мяжой, стварыць дадатковыя працоўныя месцы.

КАМПЕТЭНТНА

Таццяна Карнеева, начальнік аддзела эканомікі Дрыбінскага райвыканкама:

- Працягваецца праца па прасоўванні інвестыцыйнай прывабнасці раёна. У гэтым годзе для рэалізацыі праектаў накіраваны прапановы інвестарам для размяшчэння вытворчасцей на зямельных участках, прызначаных для будаўніцтва аб'ектаў, прадугледжаных інвестдагаворамі, а таксама маёмасці, што не выкарыстоўваецца, размешчанай на тэрыторыі раёна.

Мы сфарміравалі пералік з 11 участкаў, якія сумесна з інвестыцыйнымі прапановамі размешчаны на афіцыйным сайце Дрыбінскага райвыканкама ў раздзеле «Інвестару».

 СБ, фота Галіны Гаўрыловіч