У Магілёўскім ліцэі прайшла дыялогавая пляцоўка аб захаванні гістарычнай памяці

Тэматычная дыялогавая пляцоўка, прысвечаная захаванню гістарычнай памяці, прайшла ў Магілёўскім абласным ліцэі № 3. Пра гэта расказалі ва ўстанове адукацыі.

Удзельнікамі сустрэчы сталі каля 200 чалавек: ліцэісты, член Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Наталля Тарасенка, вучоны сакратар Беларускага дзяржаўнага музея гісторыі Вялікай Айчыннай вайны Ала Гаўрылава, адміністрацыя і педагагічны калектыў ліцэя.

Па словах Алы Гаўрылавай, музей гісторыі Вялікай Айчыннай вайны надае асаблівую ўвагу культурна-адукацыйнай дзейнасці з дзецьмі і моладдзю. «Гістарычная памяць – паняцце не толькі ёмістае, але і вельмі значнае. Важна разумець, што яна адрозніваецца ад гістарычных ведаў. Чалавек можа ведаць вельмі многа пра гісторыю, але гэтыя веды абстрактныя для яго, не вельмі яго хвалююць і не аказваюць рэальнага ўплыву на яго жыццё, – адзначыла яна. – Для беларуса гістарычная памяць – гэта сувязь часоў і пакаленняў, непарыўнасць лёсу незалежнай Беларусі з гераічнымі старонкамі гісторыі нашага народа».

Падчас сустрэчы педагогі і навучэнцы ліцэя прэзентавалі свае даследчыя працы, прысвечаныя як Вялікай Айчыннай вайне, так і мірнаму жыццю сем’яў навучэнцаў. Адным з новых праектаў стала эстафета «Не прайсці міма», падчас якой вучні і педагогі, падарожнічаючы летам па Беларусі, фатаграфавалі малавядомыя помнікі і пахаванні байцоў Чырвонай Арміі, партызан і мірных грамадзян, якія загінулі ў гады Вялікай Айчыннай вайны. Удзельнікі эстафеты рабілі фота, вызначалі геалакацыю, а пасля наносілі на спецыяльную інтэрактыўную карту. Сааўтарамі гэтай ідэі сталі настаўнік гісторыі Вераніка Нікалаенка і вучаніца 11-га класа Вераніка Александровіч.

У ліцэі ўпэўнены, што такая праца не толькі дапамагае ў адукацыйным працэсе, але і выхоўвае ў дзецях павагу і беражлівыя адносіны да гісторыі Вялікай Айчыннай вайны і ўсёй краіны ў цэлым.

Наталля Тарасенка, звяртаючыся да ўдзельнікаў дыялогавай пляцоўкі, падкрэсліла, што тэма генацыду беларускага народа непарыўна звязана з тэмай захавання гістарычнай памяці. «Вайна прайшла вогненным колам праз лёсы практычна ўсіх беларускіх сем’яў, назаўжды пакінула рубцы на сэрцы кожнага, хто захоўвае памяць аб вялікім подзвігу нашага народа, – адзначыла яна. – І сёння стала асабліва важна ведаць сапраўдныя факты гісторыі, каб не дапусціць скажэння нашай гісторыі і ўплыву звонку».

Як адзначыла настаўніца гісторыі Магілёўскага абласнога ліцэя № 3 Юлія Абрамава, на такіх дыялогавых пляцоўках дзеці не толькі асэнсоўваюць гістарычныя факты, але і перажываюць эмоцыі, адчуваюць гонар за гісторыю сваёй краіны. Пляцоўка была падзелена на некалькі блокаў. І, як адзначылі арганізатары, фармат дыялогавай пляцоўкі апраўдаў сябе: ліцэісты змаглі не толькі паслухаць гасцей, але і задаць ім пытанні, пагутарыць.

Фіналам дыялогавай пляцоўкі стала ўзнагароджанне самых актыўных ліцэістаў, педагогаў і запрошаных гасцей значком «Гісторык зацікаўлены».

БЕЛТА