У верасні ў параўнанні са жніўнем бягучага года сітуацыя на валютным рынку рэгіёна кардынальна змянілася: істотна знізіўся попыт насельніцтва на замежную валюту. Пра гэта карэспандэнту сайта паведамілі ў галоўным упраўленні Нацыянальнага банка па Магілёўскай вобласці.

Так, паводле інфармацыі суразмоўцаў, у жніўні на фоне росту часовых дэвальвацыйных чаканняў назіраўся павышаны попыт на замежную валюту з боку фізічных асоб: насельніцтвам было набыта ў наяўнай і безнаяўнай формах – $56,9 млн. у эквіваленце, здадзена ў банкаўскія ўстановы – $28,1 млн. Пры гэтым большую частку складалі валютна-абменныя аперацыі з наяўнай замежнай валютай: у жніўні фізічнымі асобамі набыта ў наяўнай форме $46,6 млн., прададзена – $25 млн.

У верасні запатрабаванасць наяўнай замежнай валюты знізілася амаль удвая і склала $26,6 млн. За гэты ж перыяд здадзена фізічнымі асобамі ў банкаўскія ўстановы $27,7 млн. Такім чынам, жыхары вобласці выступілі ў якасці чыстых прадаўцоў наяўнай замежнай валюты (станоўчае сальда $1,1 млн.).

У наяўнай і безнаяўнай формах фізічныя асобы за верасень набылі замежную валюту ў суме $31,8 млн.; продаж валюты ў верасні склаў $30,6 млн.