Віялета Бардзілоўская выйграла золата этапу Кубка свету ў Баку па скачках на батуце

Беларуская спартсменка Віялета Бардзілоўская стала пераможцай этапа Кубка свету па скачках на батуце ў сталіцы Азербайджана.

Удзел у спаборніцтвах прыняла 21 дзяўчына, у нядзельны фінал з кваліфікацыі прайшла наймацнейшая васьмёрка. У вырашальным раундзе лепшы вынік паказала сярэбраная медалістка Летніх Алімпійскіх гульняў у Парыжы магіляўчанка Віялета Бардзілоўская, якая набрала 56,070 бала. Другое і трэцяе месцы адпаведна занялі японка Хікару Моры і расіянка Сафія Аляева, якія ўступілі беларусцы менш як 0,5 бала. Яшчэ адна беларуская спартсменка Кацярына Яршова стала ў фінале сёмай, а Злата Мініяметава размясцілася на 13-м радку ў кваліфікацыі.