«Дакументальнае кіно з элементамі ігравога». Прэм'еры кінадылогіі «Нашы сімвалы» прайшлі ў Мінску і Магілёве

Прэм'еры кінадылогіі «Нашы сімвалы» прайшлі ў Мінску ў кінатэатры «Піянер» і ў Магілёве ў кінатэатры «Чырвоная зорка».

«Дзве кінастужкі аб'яднаны агульнай тэмай дзяржаўных сімвалаў. Фільм Дзмітрыя Цыбулькі раскажа аб стварэнні Дзяржаўнага флага, а фільм Яўгена Шлемянкова - аб стварэнні Дзяржаўнага герба нашай краіны. Два фільмы зроблены ў рознай стылістыцы. Першы ў больш дакументальнай, а другі фільм - гэта эксперымент. Мы вырашылі быць бліжэй да гледача і паспрабаваць крыху іншы падыход да дакументалістыкі, таму тут будзе сумяшчэнне ігравога і дакументальнага кіно», - сказаў дырэктар студыі дакументальнага кіно «Летапіс» Нацыянальнай кінастудыі «Беларусьфільм» Уладзімір Мілаш.

На яго думку, кінадылогія дынамічная і займальная і кожны глядач знойдзе ў ёй шмат цікавага, бо і сама здымачная каманда ў працэсе работы адкрывала для сябе новыя факты.

Рэжысёр фільма «Дзяржаўны герб Рэспублікі Беларусь» Яўген Шлемянкоў адзначыў, што першапачаткова сцэнарый меў больш дакументальны характар, але разам з Міністэрствам культуры яны вырашылі зрабіць яго больш зразумелым і даступным для дзіцячай аўдыторыі. «Шчыра, я паглядзеў усе фільмы пра дзяржаўныя сімвалы іншых краін, але нідзе не бачыў такога фармату. З дакументалістыкі гэта ператварылася ў ігравое кіно з элементамі дакументалістыкі, якія ў нас падкрэсліваюць архівы і спікеры», - растлумачыў Яўген Шлемянкоў.

Здымкі праходзілі на Нацыянальнай кінастудыі «Беларусьфільм», у Нацыянальным архіве Беларусі і сталічнай гімназіі №33. Працаваць над фільмам дапамагалі і гістарычныя кансультанты. «Мы ўзялі выключна гісторыю сучаснага герба. Чаму ён выглядае менавіта так, а не інакш, якія гістарычныя дасылкі маюць яго элементы, - растлумачыў рэжысёр. - Таксама мы акцэнтаваліся на апошніх карэкціроўках герба, якія адбыліся ў 2021 годзе. Менавіта пра гэта даведаюцца дзеці ў фільме».

Паводле слоў Уладзіміра Мілаша, кінадылогія разлічана не толькі на дзяцей, але і на людзей старэйшых. Яна прапануе акунуцца ў даследаванне разам з героямі і адчуць сябе на іх месцы. Убачыць прэм'еру можна будзе ва ўсіх кінатэатрах краіны.

Акрамя таго, на студыі дакументальнага кіно «Летапіс» паралельна вядуцца работы над трыма праектамі: «Душа Арміі» пра доблесных абаронцаў нашай Радзімы, фільмы пра Чарнобыль і Канстытуцыю Рэспублікі Беларусь, якія таксама здзівяць гледачоў цікавай падачай.

БЕЛТА