Хакеісты «Магілёва» здабылі першую перамогу ў сезоне экстралігі

Чатыры матчы - у Оршы, Маладзечне, Жлобіне і Смаленску - адкрылі праграму сёмага тура рэгулярнага чэмпіянату беларускай хакейнай экстралігі.

Цэнтральнай гульнёй дня стаў паядынак «Металурга» і «Шахцёра». Перад гэтай сустрэчай жлабінчане выйгралі тры матчы запар, «гарнякі» - чатыры. Пераможную серыю працягнулі хакеісты салігорскага клуба, якія святкавалі поспех з лікам 3:2. Аўтарам вырашальнай шайбы стаў 19-гадовы Арсень Чухраеў. Таксама пятую вікторыю запар атрымала «Дынама-Маладзечна» - «бела-блакітныя» дамы былі мацнейшымі за наваполацкага «Хіміка» (6:3), два дакладныя кідкі нанёс Іван Аношка.

Сёмы тур рэгулярнага чэмпіянату стаў шчаслівым для «Магілёва», які пачаў сезон з шасці паражэнняў. «Львы» з берагоў Дняпра на выездзе справіліся з аршанскім «Лакаматывам» (5:2), гол плюс пас за пераможцаў аформіў сын галоўнага трэнера клуба Мацвей Мацерухін. Самым дзейсным паядынкам дня аказаўся матч у Смаленску, дзе «Славуціч» дзякуючы дублям у выкананні адразу трох хакеістаў адолеў «Авіятар» з лікам 8:4.

БЕЛТА