Дыялогавая пляцоўка «Беларусь суверэнная» прайшла ў Магілёўскім гандлёвым каледжы

У сценах філіяла УА «БТЭУПК» «Магілёўскі гандлёвы каледж» адбылася дыялогавая пляцоўка «Беларусь суверэнная». Перад моладдзю выступілі старшыня Пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Рэспублікі Беларусь Ігар Марзалюк і старшыня Магілёўскай абласной арганізацыі РГА «Патрыёты Беларусі» Аляксандр Шкадаў.

Форум стаў пляцоўкай для абмеркавання гісторыі і дасягненняў Беларусі. Спікеры расказалі пра асноўныя вехі станаўлення і развіцця Беларусі, як краіна прайшла шлях ад эканамічнага крызісу да стабільнасці і працвітання.

Тлумачачы розніцу паміж паняццямі «незалежнасць» і «суверэнітэт», Ігар Марзалюк адзначыў:

– Незалежнасць – гэта афіцыйнае прызнанне існавання дзяржавы на міжнароднай арэне. А суверэнітэт – гэта рэальная здольнасць краіны самой вызначаць сваю будучыню: будаваць палітыку, развіваць эканоміку і прымаць рашэнні без знешняга ціску або ўказанняў звонку - няхай гэта будзе з Вашынгтона, Пекіна, Масквы або любога іншага цэнтра ўплыву.

Навучэнцы каледжа актыўна задавалі пытанні і дзяліліся сваімі меркаваннямі. Маладыя людзі адзначылі, што такія сустрэчы - важны крок у фарміраванні ўсвядомленага стаўлення да гісторыі, сучаснасці і будучыні сваёй краіны.

Ангеліна Чарнышэнка, фота аўтара