У Магілёўскай вобласці прыпынена купанне ў дванаццаці зонах адпачынку, абмежавана ў адной

У Магілёўскай вобласці прыпынена купанне ў дванаццаці, абмежавана ў адной з 50 афіцыйна вызначаных зон для адпачынку. Пра гэта паведамілі ў абласным цэнтры гігіены, эпідэміялогіі і грамадскага здароўя.

Прадпісанне вынеслі супрацоўнікі санітарна-эпідэміялагічнай службы рэгіёна пасля маніторынгу якасці вады. Спецыялісты адабралі 197 пробаў у адкрытых вадаёмах, 27 з якіх не адпавядалі гігіенічным нарматывам па мікрабіялагічных і санітарна-хімічных паказчыках.

Па выніках лабараторнага кантролю прыпынена купанне дзяцей і дарослых на:

- Грабянёўскім і Пячэрскім вадасховішчах, пляжы на рацэ Днепр у Магілёве;

- сажалцы ў вёсцы Вільчыцы Магілёўскага раёна;

- зоне адпачынку «Баравец» Касцюковіцкага раёна;

- месцах адпачынку каля вадаёма Слабадской і «Пяскі» на рацэ Друць у Бялынічах, «Нежкава» на рацэ Вабіч у вёсцы В. Нежкаў і «Сажалка Дачная» ў вёсцы Няропля Бялыніцкага раёна;

- гарадскіх пляжах №1 «Цэнтральны» і №2 6-га мікрараёна Бабруйска, зоне рэкрэацыі санаторыя «Шыннік» ААТ «Белшына» горада на Бярэзіне.

Абмежавана купанне дзяцей на пляжы санаторыя ім. У.І. Леніна Бабруйска.