Шклоўскае «Домабудаванне» паставіла партыю жылых дамоў у Японію

Філіял «Домабудаванне» РУП «Завод газетнай паперы» (Шклоў) ажыццявіў першую пастаўку камплектаў каркасна-шчытавых дамоў у Японію. Пра гэта паведаміла прэс-сакратар канцэрна «Беллеспаперапрам» Ружэна Навіцкая.

Гаворка пакуль ідзе аб двух жылых дамах плошчай 90 і 60 кв. м, а таксама будынку кафэ плошчай 28 кв. м. Як чакаецца, груз даставяць да месца прызначэння да канца кастрычніка. Шэф-мантаж будынкаў правядуць спецыялісты філіяла «Домабудаванне».

Кантракт на пастаўку жылых дамоў быў падпісаны па выніках візіту дэлегацыі японскіх бізнес-кругоў на «Домабудаванне». «Патэнцыйныя заказчыкі пабывалі на прадпрыемстве яшчэ летась. Яны азнаёмілася з тэхналогіяй вытворчасці і якасцю дамоў. Прыступіўшы ў гэтым годзе да рэалізацыі праекта па будаўніцтве базы адпачынку для экалагічнага турызму на востраве Акінава, японская кампанія прыняла рашэнне заказаць дамы з натуральных драўняных матэрыялаў у Беларусі», – расказала Ружэна Навіцкая.

Філіял «Домабудаванне» – беларуская вытворчасць, якая выкарыстоўвае найноўшыя тэхналогіі і абсталяванне вядучых еўрапейскіх вытворцаў для вырабу піламатэрыялаў іглічных парод, вырабаў з драўніны, брусу клеенага, камплектаў каркасна-панэльных (шчытавых) дамоў і дамоў з клеенага брусу.

БЕЛТА