КДК Магілёўскай вобласці праверыў сістэму аховы здароўя Асіповіцкага раёна

На пасяджэнні калегіі Камітэта дзяржкантролю Магілёўскай вобласці разгледжаны вынікі аўдыту эфектыўнасці выкарыстання бюджэтных сродкаў і дзяржаўнай маёмасці ў сістэме аховы здароўя Асіповіцкага раёна. Пра гэта паведаміў намеснік старшыні ведамства Аляксей Іглікаў. 

Дзяржаўнымі кантралёрамі былі выкрыты неадзінкавыя парушэнні бюджэтнага і іншага заканадаўства пры выкарыстанні дзяржаўных сродкаў, ажыццяўленні закупак, фінансава-гаспадарчай дзейнасці і вядзенні бухгалтарскага ўліку.

Па выніках кантролю вернута ў бюджэт больш за Br36 тыс., павялічаны кошт асноўных сродкаў і прыняты да ўліку аб’екты на суму Br150 тыс., да адміністрацыйнай адказнасці прыцягнута 13 службовых асоб. Камітэтам звернута ўвага зацікаўленых на неабходнасць прыняцця дадатковых мер па забеспячэнні выканання ў раёне мэтавых паказчыкаў па рэалізацыі дзяржпраграмы «Здароўе народа і дэмаграфічная бяспека на 2016–2020 гады».