100-годдзе дзяржаўнай малочнай перапрацоўкі Магілёўшчыны адсвяткавалі ў Палацы культуры вобласці

Напярэдадні Дня работнікаў сельскай гаспадаркі і перапрацоўчай прамысловасці аграпрамысловага комплексу ў Палацы культуры вобласці 19 лістапада ўшаноўвалі работнікаў малакаперапрацоўчых прадпрыемстваў. Са знамянальнай падзеяй – 100-годдзем малочнай перапрацоўкі рэгіёна – юбіляраў павіншавалі старшыня Магілёўскага аблвыканкама Анатоль Ісачанка, намеснік прэм’ер-міністра Леанід Заяц, міністр сельскай гаспадаркі і харчавання Ігар Брыло, старшыня абласнога Савета дэпутатаў Ірына Раінчык.

На ўрачыстасць з’ехаліся працаўнікі малакаперапрацоўчых прадпрыемстваў з усяго рэгіёна. У фае ўстановы культуры былі арганізаваны выстава-прэзентацыя і дэгустацыя прадукцыі найбуйнейшага ў вобласці вытворцы ААТ «Бабушкина крынка» – кіруючай кампаніі холдынгу «Магілёўская малочная кампанія “Бабушкина крынка”». У гэты дзень кампанія прадэманстравала ўзоры сваёй прадукцыі рэкордных памераў, сярод якіх – галоўка цвёрдага сыру вагой 100 кг, 150-кілаграмовы гіганцкі ражок марожанага і 200-кілаграмовы глазураваны сырок. Па словах арганізатараў выставы, частка з экспанатаў-гігантаў адправіцца на дабрачыннасць у сацыяльныя ўстановы для дзяцей і пажылых людзей.

Як адзначыў падчас віншавальнай прамовы Анатоль Ісачанка, Сучасны холдынг «Бабушкина крынка» з’яўляецца спадчыннікам шматвяковых слаўных традыцый магіляўчан у мастацтве вырабу малочных прадуктаў. Сёння на прадпрыемстве вырабляецца больш за 260 найменняў прадукцыі, што дазваляе кожнаму спажыўцу выбраць прадукт па сваіх перавагах і жаданнях. Поспехі магілёўскіх малочнікаў заслужана адзначаны не толькі ў Беларусі, але і за мяжой. У 2021 годзе прадпрыемства стала лідарам спажывецкага рынку рэспублікі, а конкурс «Малочны поспех» у Сочы прынёс прадпрыемству 13 заслужаных узнагарод. А выстава «ПРОДЭКСПО – 2022» у Маскве яшчэ больш – 32. За інавацыйныя тэхналогіі генеральны дырэктар кампаніі Генадзь Скітаў узнагароджаны дыпломам «Лідар кіравання».

«За стагадовую гісторыю развіцця дзяржаўнай малочнай прамысловасці вы здолелі дамагчыся значных вынікаў і стаць вядучым экспартнаарыентаваным прадпрыемствам па перапрацоўцы малака, іграць важную ролю ў сацыяльна-эканамічным развіцці Магілёўскай вобласці, – падкрэсліў Анатоль Ісачанка. – Кампанія «Бабушкина крынка» займае лідзіруючыя пазіцыі ў сваім сегменце, аб’яднаўшы 19 малакаперапрацоўчых прадпрыемстваў вобласці, а гэта каля трох тысяч супрацоўнікаў, якія нацэлены на агульную палітыку і стратэгію развіцця.

Варта адзначыць, што колькасць гарадоў і краін, знаёмых са смачнымі і карыснымі прадуктамі магілёўскага холдынгу пастаянна расце, пашыраецца геаграфія паставак: гэта ўсе рэгіёны Беларусі, рынкі Расіі, Украіны, Казахстана. Экспарт сухіх малочных прадуктаў наладжаны ў Кітай, Інданэзію, В’етнам, Бангладэш, Кубу.

Работнікам малочнай вытворчасці Анатоль Ісачанка пажадаў нароўні з гісторыяй і традыцыямі перапрацоўкі малака захаваць і тры складнікі яго паспяховай стратэгіі – толькі натуральная сыравіна, бесперапынная мадэрнізацыя і ўкараненне міжнародных стандартаў якасці. І выказаў упэўненасць, што прадпрыемству па перапрацоўцы малака пад сілу не толькі захоўваць высокую планку флагмана перапрацоўчай прамысловасці Рэспублікі Беларусь, але і дасягаць яшчэ больш высокіх вынікаў у павелічэнні аб’ёму перапрацоўкі сыравіны і вытворчасці прадукцыі.

У гэты ўрачысты дзень словы віншаванняў адрасаваў працоўным калектывам прамысловых і сельгаспрадпрыемстваў і Леанід Заяц.

«Прыемна і сімвалічна, што 100-годдзе малочнай перапрацоўкі рэгіёна супадае са святам усіх працаўнікоў вёскі. Нам сапраўды ёсць чым ганарыцца. Мы годна завяршаем бягучы год. Усе працаўнікі сельскай гаспадаркі прыклалі максімум намаганняў, каб забяспечыць стабільнасць харчавання ў нашай дзяржаве, – адзначыў ён. – Па ўсёй рэспубліцы сабраны небывалы ўраджай – каля 11 млн тон збожжа намалочана з палёў. Мы забяспечылі закладку ў грамадскія сектары, разлічыліся з дзяржаўным запасам, заклалі падмурак для далейшага развіцця аграпрамысловага комплексу Беларусі.

Дастаткова дынамічна сёння ідзе рэалізацыя нашай прадукцыі, у тым ліку – за межы дзяржавы. За 9 месяцаў гэтага года дасягнута высокая планка – $6 млрд, па завяршэнні года чаканая лічба – звыш $8 млрд. Гэтыя поспехі звязаны з працавітасцю нашых людзей. Усіх іх аб’ядноўвае пачуццё абавязку, вернасць справе, адданасць прафесіі і грамадзянская адказнасць».

З галоўнай трыбуны таксама свае віншаванні выказаў Ігар Брыло, адзначыўшы, што нездарма свята аграрыяў мае такую назву – Дзень работнікаў сельскай гаспадаркі і перапрацоўчай прамысловасці: «Перапрацоўка сельскагаспадарчай сыравіны – гэта неад’емная частка сферы АПК.

Больш за 1800 найменняў малочнай прадукцыі выпускаецца ў Беларусі. Такога асартыменту няма ні ў адной краіне свету. Але яшчэ важней іншае: наша прадукцыя якасная і карыстаецца заслужаным попытам. Рэкордным па экспарце быў мінулы год, такім жа па выніках чакаецца і цяперашні. Мясамалочную, хлебабулачную прадукцыю мы адпраўляем у больш чым 100 краін свету.

Хочацца адзначыць, што людзі, якія працуюць у сельскай гаспадарцы, перш за ўсё, вельмі працавітыя і сціплыя. Таму яны заслугоўваюць шмат добрых слоў на свой адрас. Яны патрыёты сваёй краіны. І неадступна стаяць на варце харчовай бяспекі. Бо чым вышэйшы ўраджай мы атрымаем і чым больш вырабім нашай прадукцыі, тым лепш. Гэта залог сацыяльнай і палітычнай стабільнасці Беларусі».

З прафесійным святам і юбілеем малакаперапрацоўчай галіны павіншавала ўдзельнікаў урачыстасці, падзякаваўшы ім за працу, Ірына Раінчык.

«Аграрны сектар з’яўляецца найважнейшай сферай у эканоміцы. І работнікі «Бабушкиной крынки» ўносяць важкі ўклад у харчовую бяспеку нашай вобласці і нашай краіны, дабрабыт кожнай беларускай сям’і.

Асаблівыя словы падзякі хочацца адрасаваць ветэранам за іх карпатлівую працу, прафесіяналізм, вопыт і веды, якія яны перадаюць маладым. Не магу не адзначыць, што вельмі прыемна бачыць у галіны так многа моладзі.

Кожнай сям’і і кожнаму работніку сферы жадаю міру, дабра і дабрабыту, а прадпрыемствам – далейшага росквіту», – рэзюмавала яна.

На сцэне Палаца культуры вобласці найлепшым у сваёй справе ў гэты дзень уручылі заслужаныя ўзнагароды. Таксама атмасферу свята дапоўніла яркае лазернае шоу і творчы канцэрт.

Юлія Таранава, фота Галіны Гаўрыловіч