Рус Бел Eng 中文

Дыялогавая пляцоўка па канстытуцыйных зменах з прадстаўнікамі гарадскіх грамадскіх аб’яднанняў адбылася ў Магілёве

Дыялогавая пляцоўка для кіраўнікоў і актыву грамадскіх аб’яднанняў Магілёва, на якой абмеркавалі тэму «Канстытуцыйная рэформа ў кантэксце грамадска-палітычных працэсаў у Рэспублікі Беларусь. Рэферэндум», прайшла 6 студзеня на базе СШ № 21. У сустрэчы прынялі ўдзел прадстаўнікі Маггарвыканкама – намеснік старшыні Ала Галушка і начальнік аддзела ідэалагічнай работы і па справах моладзі Ірына Бацішчава, а таксама прарэктар па вучэбнай рабоце МДУ імя А. А. Куляшова, член Савета Рэспублікі Нацыянальнага сходу Алег Дзячэнка і старшыня Каардынацыйнага савета грамадскіх і нацыянальных аб’яднанняў, палітычных партый і прафсаюзных арганізацый Магілёва Галіна Бяляева.

– Галоўная мэта падобных сустрэч – усенароднае і ўсебаковае абмеркаванне асноўнага закона краіны, па якім жыць не толькі нам, але і нашым дзецям, – сказала Ала Галушка. – І адна з задач – заклікаць усіх жыхароў да актыўнага ўзаемадзеяння і стваральнай дзейнасці на карысць горада, вобласці, краіны.

– Дыялогавыя пляцоўкі і абмен думкамі – самы дакладны фармат падобных сустрэч, каб голас кожнага грамадзяніна Беларусі быў пачуты. Канстытуцыя краіны павінна быць блізкая і зразумелая беларусам, – упэўнены Алег Дзячэнка, пачынаючы сваё выступленне перад аўдыторыяй. Ён дэталёва пазнаёміў прысутных са зменамі, выказаў сваё меркаванне і заклікаў да дыялогу.

Прысутныя актыўна ўключаліся ў абмеркаванне. Выказваліся розныя меркаванні і прапановы, якія, на думку людзей, маглі б знайсці адлюстраванне ў змененай Канстытуцыі. У прыватнасці, былі ўнесены прапановы па дэмаграфічнай палітыцы, патрыятычным выхаванні, сферы аховы здароўя. Агучвалася меркаванне аб тым, што ў Беларусі міжнароднае права не павінна быць у прыярытэце, і не можа быць вышэйшае за ўнутрыдзяржаўнае (артыкул 8), бо Беларусь пазіцыянуе сябе як суверэнная і незалежная дзяржава. Таксама звярталі ўвагу на слова «разнастайнасць», якая, на думку аднаго з выступоўцаў, з’яўляецца «тэрмінам-мяшком», дзякуючы чаму можна будзе трактаваць сэнс выкладзенага некарэктна (у прыклад прывялі артыкул 4). У артыкуле 15, у якім гаворыцца аб захаванні гісторыка-культурнай і духоўнай спадчыны, а ў кантэксце ВАВ, прапаноўвалася замяніць «беларускі» народ на «савецкі». Не абышлі бокам і тэму гендарнай талерантнасці.

Таксама была агучана просьба аб наяўнасці ў продажы друкаванага варыянта праекта змяненняў і дапаўненняў у Канстытуцыю. Бо, нягледзячы на тое, што тэкст можна знайсці ў вольным доступе ў інтэрнэце, многім жыхарам лепш азнаёміцца з дакументам на папяровым носьбіце.

Усе прапановы былі запісаныя для наступнай перадачы ў Нацыянальны Цэнтр прававой інфармацыі. Нагадаем, з праектам змяненняў і дапаўненняў Канстытуцыі Рэспублікі Беларусь можна азнаёміцца на сайце Нацыянальнага прававога інтэрнэт партала. Меркаванні адносна зместу праекта змяненняў і дапаўненняў, а таксама магчымыя прапановы па яго ўдасканаленні можна накіраваць па электроннай пошце sbor@ncpi.gov.by; з дапамогай электроннай формы; або ў пісьмовым выглядзе на адрас 220030, г. Мінск, вул. Берсана, 1а, НЦПІ, з паметкай «Канстытуцыя».

У завяршэнні сустрэчы Галіна Бяляева агучыла зварот членаў Каардынацыйнага савета грамадскіх і нацыянальных аб’яднанняў, палітычных партый Магілёва, які заклікае ўсіх жыхароў горада прыняць актыўны ўдзел у абмеркаванні праекта новай рэдакцыі Асноўнага закона і абавязкова прагаласаваць на агульнанацыянальным рэферэндуме. «Набліжаецца найважнейшая для краіны палітычная падзея, – у прыватнасці гаворыцца ў звароце, – канстытуцыйны рэферэндум, які вызначыць, якім шляхам ісці нашай суверэннай краіне, як супрацьстаяць сучасным выклікам, захаваўшы ўсё лепшае, што было створана за гады незалежнасці. Бо толькі непасрэднае волевыяўленне беларусаў, а не дыктат звонку ці эканамічныя санкцыі, можа змяніць палітычную сістэму краіны ў тым кірунку, у якім палічыць патрэбным беларускі народ».

mogilevnews.by

Пры выкарыстанні матэрыялаў актыўная гіперспасылка на mogilev-region.gov.by абавязковая