Магілёўцы прадставяць на тэатральных сустрэчах «Лялькін куФЭр» чатыры пастаноўкі

Магілёўскі абласны тэатр лялек прадставіць на тэатральных сустрэчах «Лялькін куФЭр» чатыры пастаноўкі. Пра гэта паведаміў дырэктар установы культуры Уладзімір Андрэенка сёння падчас прэс-канферэнцыі, дзе журналістам не толькі расказалі пра фэст, але і правялі экскурсію па тэатры, азнаёміўшы з майстэрнямі, у якіх ствараецца сцэнічнае афармленне.

«Лялькін куФЭр» пройдзе з 6 па 12 верасня і збярэ на адной пляцоўцы лялечнікаў з Магілёва, Мінска, Гомеля, Маладзечна і Брэста. Праект рэалізуецца ўпершыню і прымеркаваны да юбілейнай даты – адкрыцця 45-га тэатральнага сезона ў Магілёўскім абласным тэатры лялек. 

У праграму тэатральных сустрэч увайшло восем спектакляў. Гэта разнажанравая падборка, разлічаная як на дзіцячую, так і на дарослую аўдыторыю, – расказаў Уладзімір Андрэенка.

Так, Беларускі дзяржаўны тэатр лялек (Мінск) прадставіць «горкую камедыю» «Пансіён Belvedere». Галоўныя героі спектакля – пажылыя людзі, чыё жыццё ўжо падыходзіць да свайго зыходу. Непазбежная мяжа афарбаваная для кожнага ў свае, асаблівыя фарбы. Насельнікі пансіяната праводзяць дні згодна з раскладам, аднак гэта не перашкаджае ім раз-пораз трапляць у розныя камічныя і трагічныя сітуацыі. Бо старасць – толькі нагода паразважаць пра крохкасць жыцця, дзе да апошняга ўздыху ёсць месца марам і любові.

Гомельскі дзяржаўны тэатр лялек прывязе «гармонію ўсеагульнага вар’яцтва» ў 2-х дзеяннях «FABLE». Байкі Жана дэ Лафантэна, творчасць якога вылучаецца адсутнасцю маралізатарства, але прысутнасцю цікавасці да прыроды чалавека, яго натуральнасці і спантаннасці ўспрымання свету, не звязаныя паміж сабой сюжэтам, але і не пазбаўленыя логікі. Бессэнсоўнасць, прыгажосць, глупства, смерць, свята, ліслівасць – усё гэта бурліць ў героях, хаваецца за маскамі і пад касцюмамі, гаворыць на французскай, лацінскай і рускай мовах, танчыць і спявае.

Гісторыю дзіўнага каня Халстамера паводле аповесці вялікага рускага пісьменніка Льва Мікалаевіча Талстога пакажа Брэсцкі тэатр лялек. Народжаны ад двух племянных коней, галоўны герой таксама павінен быў стаць абраным, але ператвараецца ў ізгоя – падвяла масць, рабая афарбоўка шкуры. «Ну і пачвара! – пад гэты акампанемент галасоў пачынаецца яго жыццёвы шлях. І хоць прырода надзяліла каня талентам выдатнага скакуна, пячатка адрынутага яго не пакідае. Халстамер любіць сваіх гаспадароў, абыякавых да яго лёсу. Таму яны і безаблічныя. Уладальнікам чыстага, вернага сэрца застаецца толькі конь…

Мінскі абласны тэатр лялек з Маладзечна прадэманструе жыццёвую гісторыю «Шматкі па закуточках». Гэта пацешная і павучальная гісторыя пра тое, як лясныя жыхары справіліся з хітрай лісой і дапамаглі небараку зайцу, бо была ў лісіцы ледзяная хатка, а ў зайчыка – лубяная…

Усе паказы пройдуць на сцэне Магілёўскага абласнога тэатра лялек, за выключэннем пастаноўкі «Пансіён Belvedere». Яе арганізатары вырашылі перанесці ў абласны драматычны тэатр.

Адкрыццё мерапрыемства (6 верасня) пачнецца ў 17.30 на пляцоўцы перад лялечным тэатрам. Гасцей будуць сустракаць жывыя статуі і музыканты вядомага магілёўскага калектыву Jazz City Band. У холе разгорнецца інтэрактыўная выстава, прысвечаная тэатральным сустрэчам «Лялькін куФЭр». Тут будуць устаноўлены невялікія «куфэркі» з казачнымі персанажамі ўнутры – «лялечнымі героямі спектакляў мінулых гадоў».

Праграму тэатральных сустрэч адкрые ўпадабаны гледачам спектакль Магілёўскага тэатра «Самы маленькі самалёт на свеце». У пастаноўцы расказваецца хвалюючая гісторыя пра самалёт, які трывае насмешкі ад «вялікіх» сабратаў, здольных вазіць грузы, людзей і нават сланоў. Адзінокі самалёт ляціць, куды вочы глядзяць, і сустракае самую вялікую сабаку на свеце, якая таксама пакутуе з-за сваіх памераў. Тады самалёт адпраўляецца ў рэдакцыю, каб даставіць запаветны ліст і дапамагчы новаму сябру. Дарога туды ператвараецца ў займальную і небяспечную прыгоду.

Менавіта гэты спектакль, які ўжо стаў калісьці лаўрэатам Нацыянальнай тэатральнай прэміі, у канцы верасня пакажуць на сцэне Маскоўскага губернскага тэатра. Пастаноўка прыме ўдзел у конкурснай праграме Міжнароднага вялікага дзіцячага фестывалю (г. Масква) у намінацыі «Найлепшы спектакль тэатра лялек для дзяцей у малодшай узроставай катэгорыі», пра што расказаў Уладзімір Андрэенка. Фэст праводзіцца ў межах рэалізацыі праекта «Культура малой радзімы», а мастацкі кіраўнік фестывалю – народны артыст Расіі Сяргей Бязрукаў.

На тэатральных сустрэчах у Магілёве нашы лялечнікі пакажуць яшчэ тры спектаклі: 11 верасня ў 10.00 гледачы ўбачаць танцавальную казку «Муха-Цакатуха», а ў 12.00 – прытчу «Волат-Эгаіст».

Завершыць тэатральныя сустрэчы 12 верасня «Кандыд, або аптымізм» па філасофскай аповесці Вальтэра, замаскіраванай пад плутаўскі раман. Выгнаны з «зямнога раю», замка барона Тундэр-тэн-Тронка, Кандыд вымушаны весці паядынак з жыццём. Ён адпраўляецца ў авантурнае падарожжа ў спробе знайсці адказы на складаныя філасофскія пытанні. Але ўсе ідэалы «прастадушнага» юнака разбіваюцца аб страшную рэальнасць жорсткага свету, руйнуючы філасофію аптымізму, прычыняючы боль і расчараванне.

Пастаноўка паўтара года не ішла ў тэатры. І на сустрэчах «Лялькін куФЭр» будзе яе прэм’ера ў абноўленым складзе. Галоўную ролю аддалі рэжысёру-пастаноўшчыку Магілёўскага абласнога тэатра лялек Цімуру Карэпіну. Дарэчы, гэты таленавіты малады чалавек адначасова рыхтуе з магілёўскай трупай новую пастаноўку па вядомым творы Антуана дэ Сэнт-Экзюперы «Маленькі прынц». Плануецца, што гледачы ўбачаць яе ў канцы кастрычніка.

«Лялькін куФЭр» – гэта ўвасабленне даўніх задум, жаданне сабраць на адной сцэне найлепшых лялечнікаў Беларусі, прадставіць публіцы знакавыя спектаклі, якія праходзяць з нязменнымі аншлагамі, – канстатаваў Уладзімір Андрэенка. – Упэўнены, што дзякуючы добразычлівай атмасферы, а таксама цікавым творчым сустрэчам малады праект перарасце ў фармат фестывалю, стане чарговай важнай падзеяй як для жыхароў горада, так і яго гасцей». І перадумовы да гэтага ўжо ёсць. Па словах дырэктара абласнога цэнтра лялек, калегі з Расіі і Польшчы ў папярэдніх гутарках ужо выказалі згоду стаць удзельнікамі наступных тэатральных сустрэч у Магілёве.

«Магілёўшчына багатая на тэатральныя традыцыі, – падкрэсліў начальнік упраўлення культуры аблвыканкама Алег Стэльмашок. – І высокі ўзровень калектываў пацвярджаюць іх дасягненні. У маі гэтага года Магілёўскаму абласному тэатру лялек прысвоена званне «Заслужаны калектыў Рэспублікі Беларусь». Гэта, безумоўна, вынік карпатлівай працы, пастаяннага імкнення да дасягнення новых вышынь. Упэўнены, тэатральныя сустрэчы «Лялькін куФЭр» чакае поспех, і мерапрыемства стане брэндам калектыву».

Вольга Емельянава, фота Галіны Гаўрыловіч