Магілёўская вобласць актыўна наладжвае кааперацыйныя сувязі з расійскімі партнёрамі

Аб’ядноўваючы намаганні

Пераход ад простага гандлю да стварэння кааперацыйных прадпрыемстваў – на такое паглыбленае супрацоўніцтва арыентаваў расійскіх калег Прэзідэнт Беларусі падчас нядаўняй сустрэчы з губернатарам Хабараўскага краю. Ужо даўно не абмяжоўваецца простай купляй-продажам Магілёў, дзе ўчора пабывалі госці з Хабараўска. Напярэдадні гэтай сустрэчы кіраўніцтва Магілёўскага аблвыканкама наведала Ленінградскую вобласць. Вынік – канкрэтныя праекты, кантракты, а яшчэ кааперацыйныя сувязі, на якія і накіроўвае кіраўнік дзяржавы.

СКАЗАНА

– Трэба пераходзіць да кааперацыі. І цяпер момант для таго, каб ствараць кааперацыйныя прадпрыемства.

Аляксандр Лукашэнка на сустрэчы з губернатарам Хабараўскага краю, 12 мая 2022 года.

Элементы аднаго пазла

Многія прадпрыемствы Магілёўскай вобласці заточаны на Расію, а доля экспарту рэгіёна ў краіну-суседку пераваліла за 50 працэнтаў. Супрацоўніцтва адладжана дакладнае і выверанае. Сёння развіваць адносіны трэба ўжо з прыцэлам на зменлівую палітэканомію – выкарыстоўваць рэсурсы, якімі багатыя партнёры, і прапаноўваць свае. На выхадзе можна атрымаць сумесную вытворчасць, дзе бакі не будуць баяцца збою паставак, невыканання дамоўленасцяў. Такія буйныя праекты ўжо рэалізуюцца.

У 2015 годзе ў Санкт-Пецярбургу з’явілася кампанія «Неўскі ліфт» – сумеснае прадпрыемства «Магілёўліфтмаша» і калег з Ленінградскай вобласці. Здавалася б, магілёўскія ліфтабудаўнікі цалкам паспяхова маглі б экспартаваць дэталі калегам. Але ад простых продажаў вырашылі адмовіцца на карысць кааперацыі. Логіка простая: у Санкт-Пецярбургу ёсць попыт на прадукцыю, навошта везці камплектуючыя з Магілёва, траціцца на дастаўку, калі можна вырабляць іх там. Чыстая кааперацыя двух рэгіёнаў у справе.

Бізнес пад ключ

Так пакрокава Магілёўская дэлегацыя працавала з Ленінградскай вобласцю. На бізнес-форуме з удзелам топавых прадпрыемстваў ААТ «Магілёўхімвалакно», да прыкладу, заключыла буйны дагавор на пастаўку сваёй прадукцыі. Руслан Страхар прыводзіць суму ўсіх камерцыйных кантрактаў тых дзён – 15 мільярдаў расійскіх рублёў:

– Мы заўсёды актыўна прысутнічалі ў Расіі. Але зараз новая хваля: экспартаарыентаванасць, імпартазамяшчэнне. Мы павінны знаходзіць сферы, дзе можам адзін аднаго ўзмацніць і прымусіць гэтыя шасцяронкі працаваць больш эфектыўна. І тут размова не аб куплі-продажы, а аб больш цеснай кааперацыі. Прааналізавалі, у якіх запчастках і камплектуючых маем патрэбу, якія ў Магілёўскай вобласці не вырабляюцца, і гэтую нішу пазначылі партнёрам.

Такі сумесны бізнес амаль пад ключ – вытворчасць малькоў стронгі. Дадзена: фарэлевага гаспадарка «Лахва» у Быхаўскім раёне і цікавасць з боку Ленінградскай вобласці, для якой гэта ў асноўным імпартны каштоўны прадукт. Рашэнне – сумесная кампанія. І гэта не проста пастаўкі на экспарт, а глыбокая кааперацыя.

СБ