Руслан Страхар: супастаўнасць статыстычных метадалогій – індыкатар эфектыўнай сумеснай працы Беларусі і Расіі

Супастаўнасць статыстычных метадалогій з’яўляецца індыкатарам эфектыўнай сумеснай працы Беларусі і Расіі. Такое меркаванне журналістам выказаў намеснік старшыні Магілёўскага аблвыканкама Руслан Страхар падчас пасяджэння Статыстычнага савета Нацыянальнага статыстычнага камітэта Беларусі і Федэральнай службы дзяржаўнай статыстыкі Расіі ў Магілёве.

«Для эфектыўнасці сумеснай працы Беларусі і Расіі мы павінны кіравацца адпаведнымі ўзаемнымі індыкатарамі, – адзначыў Руслан Страхар. – Таму адна з задач сённяшняга пасяджэння Статыстычнага савета Нацыянальнага статыстычнага камітэта Беларусі і Федэральнай службы дзяржаўнай статыстыкі Расіі – забеспячэнне супастаўнасці ў галіне статыстычнай метадалогіі нашых дзяржаў. Бо ў нас з вамі, як і ва ўсіх органаў дзяржаўнага кіравання, была і застаецца асноўная задача – павышэнне ўзроўню жыцця грамадзян нашых краін».

Намеснік старшыні падкрэсліў, што Магілёўская вобласць блізкая да Расіі не толькі геаграфічна, бо адносіны паміж краінамі склаліся на працягу многіх стагоддзяў і не раз даказвалі сваю духоўную і культурную супольнасць. «Шматлікія спробы звонку падзяліць нас былі дарэмныя і толькі ўмацоўвалі і рабілі мацнейшымі адзінства дзвюх дзяржаў, – падкрэсліў ён. – Велізарнае дасягненне прэзідэнтаў дзвюх дзяржаў заключаецца ў тым, што яны не разарвалі гэтыя сувязі, а паставілі іх на службу інтарэсаў нашых народаў. Сёння таксама можна гаварыць аб тым, што і міжрэгіянальнае супрацоўніцтва, заснаванае на агульнасці каштоўнасцяў і інтарэсаў, надае імпульс гандлёва-эканамічнаму развіццю».

Дзяржавы звязваюць глыбокія эканамічныя ўзаемаадносіны. У прыватнасці, кааперацыйныя сувязі паміж прадпрыемствамі дазваляюць эфектыўна пастаўляць на экспарт беларускую прадукцыю. Напрыклад, у Магілёўскай вобласці па выніках 2021 года аб’ём экспарту тавараў дасягнуў $2,6 млрд, што на 32% больш, чым у 2020 годзе. Гэта найлепшы паказчык экспарту рэгіёна за ўсю гісторыю статыстычных назіранняў, нягледзячы на ўсе складанасці, звязаныя з пандэміяй і санкцыйнымі абмежаваннямі, якія сталі актыўна ўводзіцца ў дачыненні да Беларусі яшчэ з сярэдзіны 2020 года. Па выніках мінулага года станоўчае сальда знешняга гандлю склала $1 млрд, і гэта таксама найлепшы паказчык у гісторыі рэгіёна.

«Сёння мы жывём у няпросты час: на нашых вачах адбываюцца структурныя змены сусветных палітычных, эканамічных і гандлёвых працэсаў, – працягнуў Руслан Страхар. – Змяняецца само паняцце абавязковасці выканання дамоўленасцяў, прычым часам насуперак здароваму сэнсу і асновам эканомікі. Менавіта таму для Магілёўскай вобласці, як для Беларусі ў цэлым, Расія застаецца самым важным і надзейным стратэгічным партнёрам. З кожным расійскім рэгіёнам у нас склаліся па-сапраўднаму сяброўскія стасункі. Да прыкладу, цесныя кантакты ў рэгіёна наладжаны з Прыморскіх краем. У выніку тэмп росту ўзаемнага тавараабароту Беларусі і Прыморскага краю ў 2021 годзе склаў 190% да 2020-га».

Як старшыня Савета па міжрэгіянальным і прыгранічным супрацоўніцтве дзяржаў-удзельніц СНД Руслан Страхар адзначыў, што сёння паміж рэгіёнамі Беларусі і Расіі дзейнічае 176 пагадненняў аб супрацоўніцтве ў гандлёва-эканамічнай, навукова-тэхнічнай і гуманітарнай сферах. За мінулы год арганізавана 79 рэгіянальных візітаў, у тым ліку 46 – беларускіх дэлегацый у расійскія рэгіёны. Беларускія арганізацыі прынялі ўдзел у 105 кірмашах па продажы сваёй прадукцыі ў расійскіх гарадах, адбылося 174 узаемныя візіты дэлегацый дзелавых колаў. «Глыбока перакананы, што аказваемы на нас знешні ціск павінен толькі ўмацаваць эканомікі нашых краін і больш эфектыўна выбудаваць агульную імпартазамяшчальную палітыку», – сказаў ён на заканчэнне.

БЕЛТА