Сістэму дэзынфекцыі кабіны ліфта ўльтрафіялетам распрацавалі ў магілёўскім ААТ «Зеніт»

Інавацыйную сістэму дэзынфекцыі кабіны ліфта ад грыпу і COVID‑19 распрацавалі канструктары ААТ «Зеніт». Навінку плануюць укараніць у масавую вытворчасць ужо ў пачатку 2022 года, расказаў дырэктар прадпрыемства Аляксей Вайцяховіч.

«Новая сістэма абеззаражвання, дзеянне якой заснавана на ўльтрафіялетавым выпраменьванні дыяпазону С, па сукупнасці тэхнічных параметраў і характарыстык стала сапраўды інавацыйнай, – адзначыў Аляксей Вайцяховіч. – Мадэль не мае аналагаў. Па выніках выпрабаванняў, сапраўды дазваляе абараніць чалавека ад мноства вірусаў, бактэрый, грыбкоў і іншых шкодных узбуджальнікаў – пачынаючы ад кішачнай палачкі, стафілакока і заканчваючы грыпам і нават каранаіруснай інфекцыяй. Мікрабіялагічная эфектыўнасць новай сістэмы атрымала сур’ёзную навукова-практычную доказную базу, заснаваную на лабараторных даследаваннях спецыялістаў Віцебскага медыцынскага ўніверсітэта».

Сістэма абеззаражвае як паветра ўнутры кабіны, так і яе знешнія паверхні. Яна ўяўляе сабой металічную панэль з уманціраваным ультрафіялетавым выпраменьвальнікам і выцяжной вентыляцыяй з прыладай дэзынфекцыі выдаляемага паветра. «У замкнёных памяшканнях верагоднасць заражэння рознай інфекцыяй, асабліва каранавіруснай, павялічваецца ў разы, – падкрэсліў намеснік галоўнага канструктара прадпрыемства Сяргей Ігнатаў. – Прычым небяспека захворвання ўзнікае як пры ўдыханні інфікаванага паветра, так і пры дакрананні да заражаных паверхняў – напрыклад, кнопак кіравання ліфтам. Распрацаваная на «Зеніце» сістэма дазваляе папярэдзіць два гэтыя варыянты заражэння».

Навінка працуе ў двух рэжымах. Калі ў кабіне знаходзяцца людзі, аўтаматычна запускаецца вентыляцыя і паветра накіроўваецца ў прыладу з выпраменьвальнікамі, дзе чысціцца ўльтрафіялетам і выводзіцца ў агульную шахту. Гэта выключае трапленне заражанага паветра з адной кабіны ліфта ў іншую. У сваю чаргу дэзынфекцыя паверхняў дыяпазонам жорсткага ўльтрафіялету спрацоўвае, калі ўнутры нікога няма, таму што пры працяглым уздзеянні такое моцнае апраменьванне можа нашкодзіць чалавеку. Аднак перажываць не варта: запуск дэзынфектара магчымы толькі пры гарантаванай адсутнасці пасажыраў і пасля пацверджання ўсіх сістэм абароны.

«Шматступенная сістэма кантролю абсталяваная наборам дадатковых датчыкаў абароны, – растлумачыў Сяргей Ігнатаў. – Адзін з іх уманціраваны ў панэлі прыбора: ён пацвярджае адсутнасць старонніх прадметаў на шляху выпраменьвання. Другі – датчык руху – размешчаны ў версе кабіны і правярае адсутнасць пасажыраў, трэці – датчык вагі, уманціраваны ў падлогу ліфта і дае каманду ўключэння прыбора. Пры наяўнасці ў кабіне людзей сістэма блакіруецца і ліфт працягвае працу ў штатным рэжыме. Даныя аб бягучым працэнце дэзынфекцыі адлюстроўваюцца на спецыяльнай панэлі індыкацыі, размешчанай унутры кабіны. Поўнае абеззаражванне адбываецца ўсяго за 2 хвіліны. У працэсе працы ўстаноўка не вылучае азону – гэта значыць, што выраб гігіенічна бяспечны».

Над распрацоўкай сістэмы дэзынфекцыі на прадпрыемстве працавалі каля года. За гэты перыяд выпрабоўвалася некалькі версій. Першая абеззаражвае кабіну за 50 хвілін. У працэсе ўдасканалення прылады першапачатковы час удалося скараціць у 25 разоў. Прычым палепшаная прадукцыйнасць без павелічэння спажываемай магутнасці сістэмы. Таксама за кошт тэхнічных і інавацыйных рашэнняў сабекошт сістэмы патанніўся ў 2 разы без страты якасці. Прадпрыемства можа вырабляць ад 1 тыс. такіх сістэм на месяц – усё залежыць ад попыту і патрэбы.

Сёння ААТ «Зеніт» рыхтуе пакет дакументаў на атрыманне патэнта і адабрэнне Міністэрства аховы здароўя на паўсюднае выкарыстанне распрацоўкі. Пробная партыя ліфтаў з інавацыйнай сістэмай дэзынфекцыі ўжо праходзіць апрабацыю ў новых жылых дамах у Санкт-Пецярбургу, частка ліфтаў на самім прадпрыемстве таксама абсталявана гэтымі прыладамі. У перспектыве сістэму дэзынфекцыі плануюць шырока прымяняць на аб’ектах сацыяльнай сферы і ў першую чаргу ва ўстановах аховы здароўя.

БЕЛТА