Святлана Тарасенка: інтарэсы чалавека павінны ляжаць у аснове далейшай рэалізацыі сацыяльнай палітыкі

Калегія камітэта па працы, занятасці і сацыяльнай абароне Магілёўскага аблвыканкама, на якой падвялі вынікі 2021 года і паставілі задачы на бягучы год, адбылася 8 лютага. У ёй прынялі ўдзел намеснік міністра працы і сацыяльнай абароны Валерый Кавалькоў, старшыня Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці Віктар Лісковіч, старшыня Магілёўскага абласнога Савета дэпутатаў Ірына Раінчык, памочнік Прэзідэнта – інспектар па Магілёўскай вобласці Леанід Мартынюк, намеснік старшыні Магілёўскага аблвыканкама Валерый Малашка. Па відэасувязі была арганізавана сувязь з раённымі ўпраўленнямі па працы, занятасці і сацыяльнай абароне.

З дакладам выступіла старшыня камітэта Святлана Тарасенка. Яна адзначыла, што па выніках працы за 2021 год забяспечана стабільнае функцыянаванне сістэмы. Так, намінальная налічаная сярэднямесячная заработная плата па вобласці за 2021 год склала 1156 рублёў, тэмп яе росту да 2020 года склаў 113,5%, што дазволіла забяспечыць яе рост у рэальным вылічэнні на 3,7%.

У цэлым па вобласці забяспечана выкананне прагнозных паказчыкаў у галіне садзейнічання занятасці насельніцтва. Узровень зарэгістраванага беспрацоўя на 01.01.2022 года склаў 0,2% да колькасці працоўнай сілы (пры прагнозе не больш за 1,0 %). Аказана садзейнічанне ў працаўладкаванні 17 тыс. грамадзян, у тым ліку 7,4 тыс. беспрацоўных. У мэтах павышэння канкурэнтаздольнасці на рынку працы ў 2021 годзе арганізавана навучанне 765 грамадзян, у тым ліку 542 чалавекі – «пад заказ» наймальніка.

«Сёння ўсе намаганні службы занятасці і пастаянна дзеючых камісій павінны быць накіраваны на максімальнае ўцягванне ў працоўную дзейнасць непрацоўных грамадзян, – падкрэсліла Святлана Тарасенка. – Ва ўмовах, калі асобныя арганізацыі адчуваюць рэальную патрэбнасць у кадрах, наспела неабходнасць заключэння з імі «дарожных карт» па супрацоўніцтве. Лічым, што такая форма супрацоўніцтва з наймальнікамі павінна быць дэталёва прапрацавана ўсімі гаррайвыканкамамі – і не толькі па наяўных вакансіях, але і з улікам перспектыўнай патрэбы ў кадрах.

Сур’ёзнае ўзмацненне і напаўненне павінна атрымаць праца па інфармацыйным суправаджэнні пытанняў занятасці. Сродкі масавай інфармацыі, сетка Інтэрнэт, сацыяльна значныя аб’екты, грамадскі транспарт – усё гэта павінна быць задзейнічана для інфармавання насельніцтва аб паслугах службы занятасці і магчымасцях працаўладкавання.

Ва ўмовах пашырэння дыстанцыйных паслуг вялікая стаўка ў пытаннях аператыўнага пошуку працы робіцца на электронныя кірмашы вакансій».

Па вобласці каэфіцыент частаты па няшчасных выпадках са смяротным зыходам знізіўся і склаў 3,1. Скарацілася колькасць работнікаў, занятых на працоўных месцах са шкоднымі ўмовамі працы ў арганізацыях вобласці, на 1,6%.

Юлія Таранава, фота аўтара