У трэндзе стартапаў тэмы штучнага інтэлекту і медыцыны

Ідэя на мільён

Штучны інтэлект у барацьбе з аўтызмам, крыптакашалёк, віртуальны псіхолаг: на стартап-форуме ў Магілёве прадставілі больш за 20 праектаў

Стартап-форум «Mogilev Invest Day», які адбыўся ў канцы мінулага тыдня, прайшоў ужо 16-ым разам. Арганізатары – камітэт эканомікі Магілёўскага аблвыканкама, Магілёўскі гарадскі цэнтр развіцця малога прадпрымальніцтва, ГА «Інвестыцыйны клуб “ДЭКРО”». Прэзентацыі бізнес-ідэй, бітвы стартапаў, краш-тэсты ідэй, нэтворкінг з бізнесменамі, інвестарамі і ментарамі: паводле ацэнкі экспертаў, цяперашні стартап-форум адрозніваўся вялікай колькасцю якасных праектаў.

Падкажа штучны інтэлект

На прэзентацыю аўтарам бізнес-ідэі давалася роўна дзве хвіліны: такія правілы. Але калі ментар і інвестары былі зацікаўленыя праектам, яны працягвалі час. Часам стартап – вынік шматгадовай працы цэлай каманды прафесіяналаў, але, калі гаворка ідзе пра ноу-хау, гэта становіцца зразумелым у лічаныя хвіліны. Аўтарскі калектыў праекта «BabyRAIN Technologies» прапанаваў Al-тэхналогіі для ранняй дыягностыкі аўтызму ў дзяцей. Стартап стаў пераможцам у намінацыі «Перспектыўная бізнес-ідэя». Інжынер-распрацоўшчык Аляксандр Стэфанін, які працуе на кафедры інфарматызацыі аховы здароўя Беларускай медыцынскай акадэміі паслядыпломнай адукацыі, расказаў аб праекце:

– Гаворка ідзе аб выкарыстанні штучнага інтэлекту. У нашай камандзе дзесяць чалавек: інжынеры-распрацоўшчыкі і ўрачы. Праект нарадзіўся з дысертацыі аднаго таленавітага медыка. Мы ўжо выпусцілі пілотную версію сумесна з Міністэрствам аховы здароўя, зараз апрабуем у Мінску. У выпадку станоўчай ацэнкі праект будзе маштабаваны на ўсю краіну, каб як мага раней дыягнаставаць аўтызм. На сёння не існуе аналізу, як выяўляць аўтызм ў дзяцей. Мы распрацавалі некалькі комплексаў, якія дазваляюць павысіць якасць дыягностыкі. Дзіця гуляе ў гульні, распрацаваныя ўрачамі, затым запаўняецца анкета, якая пасля апрацоўваецца. Але праект значна шырэйшы, ён уключае ў сябе і акуляры дапоўненай рэальнасці, і спецыяльныя манжэты для міястымуляціі. На ўсё гэта патрабуецца фінансаванне, таму мы актыўна шукаем інвестараў.

Не менш актуальная тэма ў медыцыне – ранняя дыягностыка рака малочнай залозы з выкарыстаннем тэхналогій штучнага інтэлекту ва ультрагукавым даследаванні. Дырэктар кампаніі Юрый Мешчаракоў адзначыў, што гэты метад зніжае рызыку ўрачэбнай памылкі:

– Калі рак малочнай залозы не выявіць на ранняй стадыі, то 83 працэнты пацыентаў жывуць менш за пяць гадоў. Мы распрацоўваем платформу з выкарыстаннем штучнага інтэлекту. «Нейронку» трэба пастаянна давучваць, паколькі з’яўляюцца новыя методыкі, алгарытмы. Выкарыстанне гэтай тэхналогіі – падказка ўрачу з вельмі высокім узроўнем дакладнасці: пухліна адрозніваецца на ўзроўні не сантыметраў, а міліметраў. У выніку біяпсія (больш траўматычны метад) праводзіцца значна радзей, мамаграфію і рэнтген рэкамендуецца выкарыстоўваць абмежаваную колькасць раз на год. Магчыма, у межах лічбавізацыі аховы здароўя распрацоўка можа ўвайсці ў стандартны набор праграм для УГД-спецыялістаў.

Пераможцам у намінацыі «Найлепшы праект у сферы інфармацыйных тэхналогій» стаў Smartdoctor.by. Гэта адукацыйная платформа для ўрачоў, па задумцы яе стваральнікаў, забяспечыць доступ да інавацыйных распрацовак, навучанне ў найлепшых сусветных экспертаў, дазволіць адпрацоўваць навыкі ў рэжыме рэальнага часу і прадаставіць доступ да праверанай базы даных. Больш за 5 тысяч урачоў ўжо прайшлі навучанне на гэтай адукацыйнай платформе.

Дапамога для праекта

Дырэктар Магілёўскага агенцтва рэгіянальнага развіцця Яўген Якімаў запрасіў удзельнікаў форума наведаць бізнес-інкубатар агенцтва:

– Мы тут падтрымліваем праекты ў сферы інфармацыйных тэхналогій, бо з’яўляемся каардынатарам IT-кластара ў вобласці. Найлепшаму праекту ў гэтай сферы дорым сертыфікат на далейшае яго суправаджэнне.

Дарэчы, сваю дапамогу ў падтрымцы інавацыйных праектаў гатова аказаць і ЗАТ «Тэхналагічны парк Магілёў»: гранты, бясплатная арэнда офіса для рэзідэнта. Сваім сертыфікатам тэхнапарк узнагародзіў аўтара праекта «Люстраныя панэлі для цяпліц».

Яшчэ адзін праект, які зараз апрабуецца ў сістэме аховы здароўя, можа быць рэалізаваны і ў іншых сферах: сістэма кіравання фізічным асяроддзем, якая дазваляе падтрымліваць на належным узроўні ва ўстановах, скажам, тэмпературу і іншыя важныя для здароўя чалавека фактары.

Аўтары праекта па стварэнні апаратнага кашалька для захоўвання крыптаактываў IceCase-рэзідэнты тэхнапарка «Карал» з Гомеля. Падчас стартап-форума быў прадэманстраваны прататып кашалька для крыптавалют.

Аляксандр Самусенка прадставіў свяцільнік біядынамічнага асвятлення, які захоўвае здароўе і павялічвае працаздольнасць дзякуючы аўтаматычнаму алгарытму кіравання, узнаўляе натуральнае асвятленне:

– Наш свяцільнік паўтарае прыроднае асвятленне. Канкурэнтаў шмат, але рынак велізарны. Мы ўжо вырабляем і прадаём свяцільнікі. Наша доля на рынку можа складаць да 40 мільёнаў долараў на год, для гэтага нам і патрэбныя інвестыцыі. У нас выдатны маркетынгавы план.

Вельмі актыўнымі аўтарамі бізнес-ідэй аказаліся прадстаўнікі навучэнскай моладзі. Цэлы партфель праектаў прэзентавалі студэнты Беларускага дзяржаўнага ўніверсітэта харчовых і хімічных тэхналогій: CRM-сістэму, праграмнае забеспячэнне для дыстанцыйнага навучання, зеляніну для катоў, біялагічна актыўныя дабаўкі расліннага паходжання. Студэнты МДУ імя А. А. Куляшова прапанавалі праект «Студэнт на гадзіну». Гаворка ідзе пра дапамогу сацыяльна неабароненым слаям насельніцтва ў вырашэнні бытавых праблем. Навучэнцы магілёўскіх каледжаў распрацавалі праекты «Разумны кран» і «Акуляры для вадзіцеляў AntiSleep» для прадухілення ДТЗ.

Пераможцам у намінацыі «Жаночая бізнес-ідэя» стаў стартап Юліі Савіцкай з Магілёўскага дзяржаўнага тэхналагічнага каледжа – вытворчасць пюрэ з крапівы. Яшчэ адзін кулінарны праект прапанавала Анфіса Янцэвіч – платформу, што аб’ядноўвае повараў, якія праводзяць для жадаючых марафоны па планаванні меню і навучальныя трэнінгі па здаровым харчаванні.

Найлепшы сацыяльны праект – Selfim. Мэтавая аўдыторыя – тыя, хто баіцца пайсці да псіхолага, баючыся за сваю рэпутацыю. У дапамогу – VR-прастора (віртуальная рэальнасць). Гэта платформа ананімнай псіхалагічнай дапамогі анлайн, якая аб’ядноўвае кліентаў і псіхолагаў. Зараз рыхтуецца запуск пілотнай версіі. Працэс уяўляе сабой трансформацыйную гульню, калі кліент з дапамогай ачкоў віртуальнай рэальнасці заходзіць у створанае мастакамі памяшканне і расказвае псіхолагу аб сваіх пачуццях, перажываннях. У экспертаў, дарэчы, па ходзе прэзентацыі ўзнікла пытанне, наколькі такія VR-сеансы бяспечныя для здароўя.

Ад ідэі да вытворчасці

Старшыня журы намеснік старшыні камітэта эканомікі Магілёўскага аблвыканкама Павел Марыненка адзначыў, што галоўны чаканы эфект ад стартап-форума – стварэнне новых вытворчасцяў і інавацыйных прадуктаў:

– Мы жывём у той час, калі толькі інавацыйны складнік у праекце – гарантыя поспеху. Велізарная заслуга такіх мерапрыемстваў у тым, што шматлікім інавацыйным стартапам патрэбныя прасоўванне і навучанне. У сціслы час аўтары, якія выступалі са сваімі ідэямі, змогуць атрымаць кансультацыі экспертаў і зразумець слабыя месцы сваіх праектаў. Усе прысутныя эксперты – людзі з багажом ведаў, вопытам па рэалізацыі праектаў. Аднак у нас у практыцы былі выпадкі, калі праекты не займалі першыя месцы, але потым былі больш паспяховыя, бо многае залежыць ад каманды, настойлівасці тых, хто гатовы даказаць, што іх ідэя – на мільён.

СБ