«Заўсёды цікава паглядзець на захапленні іншых». Фестываль творчасці інвалідаў прайшоў у Магілёве

Абласны фестываль творчасці інвалідаў «Разам мы зможам больш» сабраў у Магілёве амаль 120 удзельнікаў з усяго рэгіёну.

Паводле слоў каардынатара фестывалю - загадчыцы сектара Магілёўскага абласнога метадычнага цэнтра народнай творчасці і культурна-асветнай работы Святланы Яфрэмавай, такія мерапрыемствы асабліва важныя. Яны не толькі развіваюць творчы патэнцыял удзельнікаў, але і даюць ім магчымасць паразмаўляць адзін з адным, абмяняцца назапашаным вопытам і паказаць свае дасягненні. «Конкурс садзейнічае сацыяльнай адаптацыі інвалідаў, дае магчымасць ім удасканальвацца ў выбраным творчым шляху», - падкрэсліла яна.

Удзельнікамі мерапрыемства сталі калектывы мастацкай творчасці і індывідуальныя выканаўцы, якія прадстаўляюць грамадскія аб'яднанні людзей з абмежаванымі магчымасцямі. Яны выступілі ў 11 намінацыях, самымі шматлікімі з якіх сталі дэкаратыўна-прыкладное мастацтва, а таксама народныя, эстрадныя і жэставыя спевы.

Выставу твораў ручной работы прадэманстравалі больш за 20 майстроў. Тут можна было ўбачыць вырабы з джутавай ніткі, унікальныя аўтарскія цацкі, вырабы з лазы і іншых прыродных матэрыялаў.

Так, удзельніца ад Бабруйскай гарадской арганізацыі Беларускага таварыства інвалідаў Ірына Юшкевіч прадставіла на конкурс вышытыя бісерам іконы і карціны. Гэтае хобі стала для жанчыны аддушынай у складаны жыццёвы перыяд, яна займаецца ім ужо на працягу васьмі гадоў. У фестывалі майстрыха ўдзельнічае ўпершыню, аднак ужо цвёрда вырашыла, што прыедзе сюды яшчэ. «Больш бы такіх добрых мерапрыемстваў. Я і сваю творчасць магу паказаць, і на іншых паглядзець. І вельмі выдатна, што ёсць магчымасць паразмаўляць адзін з адным», - падкрэсліла яна.

Бабруйчанка Таццяна Навіцкая - прадстаўніца клуба «28 завес». Яе хобі - вязанне для неданошаных дзетак. Напрыклад, цацкі са жгуцікамі, якія нагадваюць заўчасна дзіцяці, якое з'явілася на свет, матчыну пупавіну. «Такі жгуцік укладваецца малому ў ручку, гэта яго супакойвае і дае асацыяцыю, што ўсё добра, як і ва ўлонні, - дзеліцца майстрыха. - Таксама нашы рукадзельніцы робяць камплекты, якія складаюцца з пледа, камізэлькі, шапачкі і шкарпэтак. Усе гэтыя рэчы павінны быць абавязкова калючымі, каб не даваць дзіцяці засыпаць - гэта важна па медыцынскіх паказаннях. Свае працы мы бясплатна рассылаем не толькі па Бабруйску, але і па іншых гарадах».

За чатыры гады захаплення Таццяна Навіцкая звязала мноства рэчаў - гаворыць, што лік ідзе ўжо на тысячы штук. «На фэст прыехала таму, што важна паказваць свае працы, дзяліцца досведам, пераймаць новыя падыходы ў творчасці, - упэўненая майстрыха. - Заўсёды цікава паглядзець, хто чым захапляецца. Асаблівыя людзі павінны быць заўважаны і не заставацца ў цені са сваёй творчасцю. Маё жыццё нічым не адрозніваецца ад жыцця фізічна здаровага чалавека: я мама, усё самастойна раблю па хаце - сціраю, прыбіраю, рыхтую, а яшчэ - захапляюся творчасцю».

У завяршэнні мерапрыемства журы падвяло вынікі і ўзнагародзіла пераможцаў. Напрыклад, у намінацыі «Дэкаратыўна-прыкладное мастацтва» дыплома першай ступені ўдастоена прадстаўніца Горацкай раённай арганізацыі «Беларускае таварыства інвалідаў» Соф'я Мяжэнная, у музычна-інструментальным выканальніцтве не было роўных удзельніку мастацкай самадзейнасці «Універсальная сямейка» Дома культуры прадпрыемства «Універсал Бабруйск» таварыства Мікалаю Нікіценку, у тэатральным мастацтве лепшым стаў калектыў «Шостае пачуццё» Дома культуры магілёўскага прадпрыемства «Метыз» таварыства глухіх.

БЕЛТА