Спартсменаў з Беларусі, Казахстана і Расіі збярэ чэмпіянат свету па летнім паліатлоне ў Магілёве

Больш за 100 спартсменаў збярэ ў Магілёве чэмпіянат свету па летнім паліатлоне ў закрытых памяшканнях (чатырохбор'е з бегам). Пра гэта расказала інструктар па фізічнай культуры спартыўнага клуба Беларуска-Расійскага ўніверсітэта Марыя Сяржук.

Мерапрыемства пройдзе з 13 па 17 красавіка на пляцоўках Беларуска-Расійскага ўніверсітэта, спартыўнага комплексу «Алімпіец» і Дома спорту. Спаборніцтвы арганізаваны па чатырох дысцыплінах: стральба з пнеўматычнай вінтоўкі, спрынт, плаванне і бег на цягавітасць. Удзел у першынстве прымуць спартсмены з Беларусі, Казахстана і Расіі.

Арганізатарамі чэмпіянату па паліатлоне выступілі Міжнародная асацыяцыя паліатлона і Беларуска-Расійскі ўніверсітэт.