Уся ў бацьку
Самы вялікі гаечны ключ з камплекта камбайнёра на першы погляд не ўпісваецца ў вобраз бландынкі з манікюрам. Але старшакласніца Дар'я Кухарава запэўнівае, што можа даць фору ў веданні тэхнікі равеснікам-хлопцам: дома дапамагае бацьку рамантаваць аўтамабіль, плануе атрымаць правы кіроўцы. Нядзіўна, што далікатную дзяўчыну мы сустракаем на жніве ў складзе брутальнай каманды механізатараў ААТ «Племзавод «Цімонава» Клімавіцкага раёна. Гэта першая Дашына ўборачная: дзяўчына сама папрасіла бацьку даверыць ёй ролю «другога пілота» у экіпажы.
![](https://mogilev-region.gov.by/files/vnbythu4xxiqowka4z93r80bnpfs8a35_0.jpg)
- Неяк тата дазволіў мне пасядзець у кабіне камбайна, - з усмешкай успамінае Даша, - і я загарэлася жаданнем працаваць разам з ім. Вам не перадаць, якое глядзець зверху на бязмежнае хлебнае мора! Гэта трэба паспрабаваць самому.
Бацька Дашы Аляксандр Васільевіч ужо 15-ы год запар на час уборачнай садзіцца за штурвал камбайна ў ААТ "Племзавод "Цімонава". Працуе слесарам у кацельні, а на камбайне з дзяцінства — сам быў памочнікам у бацькі.
З году ў год Аляксандр Кухараў у ліку перадавікоў раённых спаборніцтваў на ўборачнай. Зараз сямейны экіпаж ідзе другім, упэўнена набліжаючыся да статусу тысячніка. Раённыя "Дажынкі" пройдуць у іх родным аграгарадку Цімонава, таму ўсе аднавяскоўцы сочаць за зводкай перадавікоў і хварэюць за Кухаравых. Як тут падвядзеш?!
![](https://mogilev-region.gov.by/files/isg4roni11goqas2i2j3pn2quxvzyegl.jpg)
Аляксандр Васільевіч разам з памочніцай наводзіць глянец на камбайне перад выездам у поле:
- Сакрэт у мяне адзін - стаўленне да справы. Гэтай машыне чацвёрты год, але я і на старым камбайне таксама заўжды быў у перадавіках. Як дагледзіш тэхніку, так яна і адплаціць. Я родам з вёскі Савінічы, якая пасля Чарнобыля трапіла пад адсяленне. На малую радзіму ездзім усёй сям'ёй на Раданіцу. Цяпер мой дом тут, у Цімонава. Зямля, на якой ты працуеш, - гэта і ёсць твой дом.
Тое, што Даша - татава дачка, чытаецца па клапатлівых жэстах, поглядах, цёплых словах. Так і ёсць: яны і ў гаражы разам з машынай важдаюцца, і на шчупака ходзяць у пары.
![](https://mogilev-region.gov.by/files/ebnyi66yz360946mj1ptksehg7jobiz3.jpg)
- З дачушкай, самі разумееце, душа цешыцца, - разважае Аляксандр Васільевіч. — Я толькі за, каб дзіця паспрабавала мой хлеб, шанаваў яго. Прыходзім да сямі раніцы на мехдвор, Даша ведае свае абавязкі: прадуць паветрам фільтр і радыятар, ачысціць ад пылу прыступкі, навесці марафет у кабіне.
Пасля ўчарашняга дажджу камбайнерам прыйшлося крыху затрымацца на мехдвары. Чакалі адмашкі агранома, пакуль сонца не падсушыла каласы, нерваваліся: кожная пагодлівая гадзіна на рахунку. І нарэшце ў бункерах камбайнаў зашумела збожжа. Дар'я Кухарава, як і іншыя памочнікі ў экіпажах, перш за ўсё прынялася правяраць за тэхнікай страты. Расказвае:
- Тры зярняткі на квадратны метр - ужо непарадак: ці то машына барахліць, ці то камбайнер не на сумленне працуе. У нашай камандзе такога не бывае, бо ў мяне камандзір экіпажа - самы надзейны чалавек у свеце.
![](https://mogilev-region.gov.by/files/j4nbfcz2qwq64j2b13si7hyt0xc0n6z1.jpg)
ЛІЧБЫ
На 21 жніўня ў Магілёўскай вобласці ўбрана 80,4 працэнта збожжавых каласавых, зернебабовых і рапсу. Намалочана 654,4 тысячы тон збожжа з ураджайнасцю 25,8 цэнтнера з гектара і 89,3 тысячы тон рапсу з ураджайнасцю 19,2 цэнтнера з гектара. Выцераблена 6,8 тысячы гектара лёну, або 94 працэнты ўборачнай плошчы.
Лепшай ураджайнасці па збожжавых і зернебабовых культурах у вобласці дасягнуў СВК “Калгас “Радзіма” Бялыніцкага раёна – 69 цэнтнераў з гектара. На другім месцы - ААТ «Александрыйскае» Шклоўскага раёна (48,8), замыкае тройку лідэраў ААТ «Світанак ім. К. П. Арлоўскага» Кіраўскага раёна (47,7).
![](https://mogilev-region.gov.by/files/1wei3z1fwmsqi5i7j0vjqfhbwl1hjeoi.jpg)
![](https://mogilev-region.gov.by/files/3ux96cmvob85vtntqkni0skv1iq8to2q.jpg)
![](https://mogilev-region.gov.by/files/s1nlkp1ok3j6cjpx69zpcr0i2ovwxkg6.jpg)
СБ