Больш за 600 удзельнікаў збярэ ў Магілёве абласная міжгаліновая спартакіяда прафсаюзаў

У спаборніцтвах прымуць удзел прадстаўнікі прадпрыемстваў і арганізацый галіновых прафсаюзаў у складзе 15 зборных каманд. На працягу двух дзён – 13 і 14 верасня – на базе спартыўнага комплексу «Лакаматыў» яны паспрачаюцца за званне самых моцных, спрытных і спартыўных.

У праграму спартакіяды ўвайшло сем відаў спорту: валейбол, міні-футбол, лёгкаатлетычны крос, настольны тэніс, гіравы спорт, дартс і плаванне. У фінале будуць вызначаны агульнакамандныя, камандныя і асабістыя месцы. Пераможцаў узнагародзяць кубкамі, дыпломамі і каштоўнымі прызамі.

Як паведамілі ў Магілёўскім абласным аб’яднанні прафсаюзаў, мерапрыемства накіравана на папулярызацыю і ўдасканаленне сярод працоўных спартыўна-масавай і фізкультурна-аздараўленчай працы.

Урачыстае адкрыццё спаборніцтваў адбудзецца 13 верасня ў 10.00 на стадыёне «Лакаматыў» у Магілёве.