Юныя гімнасты Магілёва прывезлі ўзнагароды з рэспубліканскіх спаборніцтваў «Юны чэмпіён»

У Мінску прайшлі рэспубліканскія спаборніцтвы па спартыўнай гімнастыцы «Юны чэмпіён». Пра гэта паведамілі ў ДСВСУ «Магілёўская гарадская СДЮШАР “Багіма”».

За тытул змагалася каля 160 спартсменаў ва ўзросце ад 6 да 9 гадоў з Баранавіч, Крупак, Віцебска, Пінска, Гродна, Гомеля, Брэста, Бабруйска, Магілёва, Маладзечна і Мінска. Усе яны прадставілі дзіцяча-юнацкія школы, якія маюць аддзяленні спартыўнай гімнастыкі.
Сёлета рэгламент спаборніцтваў зведаў некаторыя змены: удзельнікаў падзялілі на групы па ўзростах. Дарэчы, упершыню на турніры ўвялі абавязковую і адвольную праграмы.

Па выніках другога этапу ў камандным першынстве сярод юнакоў наша каманда ў складзе Паўла Жукава, Івана Езапенкіна, Мікалая Шарая, Аляксея Сідаровіча, Рамана Сямёнава, Івана Жыбурта заняла другое месца. Абсалютнымі пераможцамі ў сваіх узроставых групах сталі: Павел Жукаў (2010 год, 1 месца) і Іван Езапенкін (2011 год, 1 месца). Мікалай Шарай прызнаны найлепшым з намінацыі «Элегантны гімнаст».

Пераможцы і прызёры спаборніцтваў атрымалі кубкі, медалі і дыпломы. Трэнеры, якія падрыхтавалі найлепшых з найлепшых, адзначаны граматамі і каштоўнымі прызамі.