Сяргей Міхалюта: маштаб чарнобыльскай трагедыі мы зможам цалкам ацаніць яшчэ не хутка

Памяць ахвяраў чарнобыльскай катастрофы ўшанавалі ў Слаўгарадзе. У дзень 36-й гадавіны аварыі на ЧАЭС мітынг-рэквіем з удзелам прадстаўнікоў улады і грамадскасці прайшоў на алеі Памяці пахаваных вёсак.

Нараўне з іншымі раёнамі Магілёўскай вобласці Слаўгарадскі ўвайшоў у лік найбольш пацярпелых ад наступстваў чарнобыльскай трагедыі: у рознай ступені радыенуклідамі была забруджана ўся яго тэрыторыя. Наступствы аварыі на ЧАЭС для раёна былі значнымі: у сувязі з адсяленнем спыніла існаванне 25 населеных пунктаў, ліквідаваны 3 сельсаветы і 4 сельскагаспадарчыя арганізацыі.

«Маштаб чарнобыльскай трагедыі настолькі вялікі, што да канца ацаніць яго можна будзе яшчэ не хутка, а праблемы, народжаныя ёю, дагэтуль не страчваюць сваёй вастрыні і актуальнасці, – адзначыў на адкрыцці мітынгу старшыня Слаўгарадскага райвыканкама Сяргей Міхалюта. – Людзі, іх лёсы, жыццё і здароўе, сацыяльная, медыцынская абарона яшчэ доўга будуць аб’ектамі ўвагі з боку органаў улады».

Старшыня падкрэсліў, што на тэрыторыі раёна наступствы чарнобыльскай трагедыі пераадольваюцца дзякуючы значнай дзяржаўнай падтрымцы. Стабільна працуе народнагаспадарчы комплекс, ажыццяўляецца паэтапнае рашэнне ўсяго спектра сацыяльных праблем. На сёння асноўнай задачай органаў улады застаецца рэалізацыя комплексу праграм па мінімізацыі наступстваў аварыі.

«Развіццё эканомікі раёна накіравана на павышэнне рэнтабельнасці прадпрыемстваў і павышэнне даходаў насельніцтва, прывабліванне інвестыцый і міжнароднае супрацоўніцтва, – працягнуў Сяргей Міхалюта. – Гэта дазваляе гаварыць аб новым этапе ў вырашэнні чарнобыльскіх праблем – пераходзе ад рэабілітацыі да развіцця пацярпелых тэрыторый Слаўгарадчыны».

Асобную падзяку ён выказаў ліквідатарам наступстваў чарнобыльскай катастрофы, якіх сёння ў раёне пражывае 163 чалавекі. «У гэты дзень мы ўспамінаем пра Чарнобыль і пра тых, хто, не шкадуючы жыцця і здароўя, змагаўся з радыяцыйнай стыхіяй, – адзначыў старшыня райвыканкама. – Ім шчырыя словы падзякі за выкананне грамадзянскага абавязку і пастаўленай задачы, якая многім з іх каштавала жыцця і здароўя».

У ліку тых, хто стаў непасрэдным удзельнікам трагічных падзей 1986 года, – мясцовы жыхар і ліквідатар наступстваў катастрофы Сяргей Траццяк: «Я быў у рыжым лесе, побач з месцам, дзе рванула гэта станцыя. Мы там жылі ў палатках, рамантавалі заражаную тэхніку. На забруджанай тэрыторыі я прабыў больш за тры месяцы. Аб праведзеным там часе лепш не гаварыць і не ўспамінаць, жудасна было. Тым больш многіх ліквідатараў ужо, на жаль, няма ў жывых».

Мерапрыемства на алеі Памяці пахаваных вёсак завяршылася ўскладаннем кветак і хвілінай маўчання. Напярэдадні мітынгу ў храме Нараджэння Найсвяцейшай Багародзіцы адбыўся малебен у памяць аб ліквідатарах наступстваў катастрофы на Чарнобыльскай АЭС.

БЕЛТА