Кіраўніцтва Магілёўскага раёна правяло вялікую сустрэчу з маладымі спецыялістамі

Валерыя Макеева і Надзея Дулуб разам вучыліся ў Горацкай сельскагаспадарчай акадэміі і нават сядзелі за суседнімі партамі, а цяпер разам адправіліся па размеркаванні ў ААТ «Фірма “Кадзіна”» Магілёўскага раёна. Працуюць бухгалтарамі ў адным кабінеце.

– Зразумела, такі важны крок у дарослае жыццё даецца прасцей, калі побач таварыш, – прызнаюцца дзяўчаты. – Хоць на працы калектыў у нас выдатны: усе падтрымліваюць, дапамагаюць, падказваюць, бо практыка значна адрозніваецца ад тэорыі, што выкладалі ў ВНУ.

Магілёўскі раён у цэлым зацікаўлены ў моладзі, якая складае толькі 20% з звыш 42 тысяч насельніцтва, таму кіраўніцтва райвыканкама і раённых службаў зладзіла вялікую сустрэчу з ёй. У Буйнічы запрасілі ўсіх 185 маладых спецыялістаў, якія атрымалі гэтым летам сваё першае працоўнае месца. Пераважная колькасць (120 чалавек!) прадстаўлялі сферу сельскай гаспадаркі, а таксама адукацыі, аховы здароўя, культуры, гандлю.

Пазнаёміць з рэгіёнам, расказаць аб магчымасцях, пачуць праблемныя пытанні – так коратка рэзюмавалі мэта мерапрыемства арганізатары.

– Маладыя кадры – наш здабытак і апора, – падкрэсліў старшыня Магілёўскага райвыканкама Алег Чыкіда. – Яны ўносяць свой уклад у развіццё рэгіёна, праяўляюць сябе на працоўных месцах, даюць свежы погляд па шэрагу напрамкаў, прыўносяць новыя павевы ў прафесію. Радуе, што з кожным годам іх прыязджае да нас усё больш. Для параўнання: у 2018 годзе прынялі 140 маладых спецыялістаў, а зараз – 185. Для іх актуальныя пытанні жылля, заработнай платы, прафесійнай рэалізацыі. Наша задача – гарантаваць сацыяльную абарону і матэрыяльную падтрымку, стварыць такія ўмовы, каб адчувалі сябе запатрабаванымі, маглі прымяніць свае веды на практыцы.

У раёне прадстаўлены практычна ўсе галіны гаспадаркі, але вядучая – аграпрамысловы комплекс. Чвэрць усёй вырабленай у Прыдняпроўскім краі сельгаспрадукцыі прыпадае менавіта на Магілёўскі раён. Адна толькі гаспадарка ў Вендаражы вырабляе за суткі столькі малака, колькі ўвесь Чэрыкаўскі раён.

Аліна Прышчэп цяпер эканаміст ЗАТ «Агракамбінат “Зара”». Учарашняя студэнтка Магілёўскага дзяржаўнага ўніверсітэта харчавання ніколькі не знервавалася, атрымаўшы размеркаванне ў сельскую мясцовасць:

– Гэта цікавы вопыт. Я родам з Гомельскай вобласці, але шчыра люблю Магілёўшчыну, таму і паехала сюды вучыцца. Працуючы ў раёне, змагу даведацца пра яе яшчэ больш. Дарэчы, вучобу ў ВНУ я сумяшчала з працай прадаўца і потым – барыста, так што цяпер атрымліваю асалоду ад спакою працоўных будняў. А жыву я ў Магілёве – усе выгоды вялікага горада даступныя.

І калі Аліна сама адмовілася ад прадастаўленага арганізацыяй жылля, то для Ільі Увакіна, які таксама папоўніў рады работнікаў «Зары», жылплошча з’яўляецца адным з найбольш актуальных пытанняў. Хлопец нарадзіўся і вырас на Данбасе, але быў вымушаны пакінуць радзіму. Прытуліла яго як раз Магілёўшчына:

– Працую электраманцёрам, праблем ніякіх няма, сустрэлі мяне выдатна. Вядома, важкую дапамогу аказвае мой настаўнік Дзмітрый Іванавіч, з якім адразу знайшлі агульную мову, але пры неабходнасці магу звярнуцца непасрэдна да кіраўніцтва.

І такі падыход да працы з маладымі спецыялістамі дае высокі працэнт іх далейшага замацавання на месцах – 72%, адзначыла начальніца аддзела арганізацыйна-кадравай работы райвыканкама Наталля Камарова:

– Першы працоўны год, вядома, многім хлопцам і дзяўчатам даецца няпроста, але ў выніку яны працягваюць працаваць у нас, паколькі бачаць магчымасці для рэалізацыі. А мы ў сваю чаргу давяраем ім абсалютна розныя пасады і нават адказныя ўчасткі працы.

СБ