Аграгарадок Александрыя Шклоўскага раёна ў 17–й раз збярэ сяброў, па традыцыі гасцінна сустракаючы кожнага і акунаючы як у народны каларыт, так і знаёмячы з сучаснымі дасягненнямі. У гэтым годзе Рэспубліканскае свята «Купалле» пройдзе 11–12 ліпеня.

Як паведамляюць арганізатары, асноўная ідэя свята – аб'яднанне вакол агульнай гісторыі, культуры і каштоўнасцяў, а таксама ўмацаванне дзяржаўнасці і суверэнітэту. Гэта ідэя будзе раскрыта ў асноўных мерапрыемствах свята, мастацкім афармленні і рабоце тэматычных зон.

Наведвальнікаў сустрэнуць новыя пляцоўкі, прысвечаныя Году беларускай жанчыны, развіццю нацыянальнага турызму, а таксама – сырны фестываль. Сваё месца займуць і ўжо ўпадабаныя гасцям лакацыі. У іх ліку – выстава–кірмаш народнай творчасці. На гэты раз яна атрымае назву «Пад пакровам купальскай Берагіні».

У свяце, як і ў папярэднія гады, прымуць удзел госці з блізкага і далёкага замежжа.На пачатак мая пацвердзілі сваю зацікаўленасць каля трох дзясяткаў рэгіёнаў Расіі, якія плануюць накіраваць звыш 70 майстроў дэкаратыўна–прыкладнога мастацтва. Упершыню ўдзел у «Купаллі» плануюць прыняць прадстаўнікі Кемераўскай вобласці і Рэспублікі Чувашыя.

Арганізатары рыхтуюць насычаную праграму з улікам інтарэсаў сямейнай аўдыторыі, моладзі і турыстаў.