ХIV Музычны фестываль «Вялікая бард-рыбалка» пройдзе 25–27 ліпеня традыцыйна на Чыгірынскім вадасховішчы ў Быхаўскім раёне ў маляўнічым месцы на тэрыторыі базы адпачынку «Чачэвічы» Магілёўскага металургічнага завода. Гасцей і ўдзельнікаў чакаюць розныя творчыя, аздараўленчыя, турыстычныя, спартыўныя мерапрыемствы, конкурсы і праекты, а таксама шматгадзінная дзённая і вячэрняя музычная праграма.
Адной з галоўных падзей музычнага форуму стане канцэрт «Вяршыні Візбара...» з удзелам гасцей фестывалю, прысвечаны класіку аўтарскай песні Юрыю Візбару. Адбудзецца прэзентацыя новага творчага праекта і першага музычнага альбома «Усё будзе дабра!» менскага гурта VODAR KAVY. На фестываль прыедуць з канцэртнай праграмай фіналісты Усерасійскага маладзёжнага конкурсу «Аўтарская песня. Хуткі старт». Дадасць лірыкі, рамантыкі і філасофскіх нотак сваімі песнямі масквічка, аўтар-выканаўца Вольга Кузняцова. Яна ж з'яўляецца чальцом Звяза расійскіх пісьменнікаў і аўтарам некалькіх паэтычных зборнікаў. Вольга Кузняцова таксама працуе актрысай агучвання, яе голасам гавораць персанажы ў фільмах і мультфільмах, вядомыя актрысы, такія як Сафі Ларэн і Брыжыт Бардо. Запаліць публіку бярэцца і легендарны мінскі гурт МОJO BLUES, які рыхтуе драйвовую танцавальную праграму з рок-н-рольных, джазавых і блюзавых хітоў.
На бард-рыбалцы ў чарговы раз чакаюць мастацкага кіраўніка аднаго з найбуйнейшых фестываляў аўтарскай песні Расіі «Пакроўскі сабор» Аляксея Вітакова. Ён жа вядомы расійскі паэт, бард і тэлевядучы, таму будзе задзейнічаны не толькі ў журы конкурснай праграмы, але і падзеліцца сваёй творчасцю на галоўнай фестывальнай сцэне ў дуэце з кампазітарам, паэтам і музыкам-мультыінструменталістам Уладзімірам Паляковым. Па дамоўленасці з Аляксеем Вітаковым лаўрэаты конкурсу аўтарскай песні і паэзіі бард-рыбалкі без адбору патрапяць у асноўны лонг-ліст «Пакроўскага сабора» і будуць змагацца за выхад у суперфінал.
У ліку музычных хэдлайнераў бард-рыбалкі таксама адзін з папулярных расійскіх музыкаў, аўтар-выканаўца Мікалай Грынько. Яму ўдаецца спалучаць у сваіх творах лірыку, бліскучы гумар і касмічную глыбіню. Сам Грынько вызначае свой музычны стыль як «поп-рок» ці «бард-поп». Мікалай вядомы як выканаўца кароткіх песень на ўкулелі, але, акрамя гэтага, іграе на шасціструннай гітары ў тэхніцы live-looping. Ён запісвае музычныя партыі падчас выступу і адразу іх узнаўляе, ператвараючы ў свежыя аранжыроўкі.
Працягне працу сёлета і адукацыйны праект «Акадэмія аўтарскай песні». Тут будуць праходзіць майстар-класы ад мэтраў па гітарным акампанеменце, аранжыроўцы, вакале, паэтычным і сцэнічным майстэрстве і г.д.
Гасцей і ўдзельнікаў фестывалю парадуюць і традыцыйныя мерапрыемствы: рыбалоўныя спаборніцтвы, кулінарны конкурс «Чыгірынская вушыца!», які праходзіць у фармаце «Рыба-фэсту», турнір па пляжным валейболе на прызы кампаніі «Гродфуд» і самы прыгожы фестывальны праект — «Каралева бард-рыбалкі». На вялікай фестывальнай паляне разгорнуцца інтэрактыўныя пляцоўкі «Кірмаш здароўя», «Горад майстроў», «Вясёлыя атракцыёны» і іншыя, а таксама будуць працаваць шматлікія фуд-корты.
Пражыванне гасцей і ўдзельнікаў на працягу трох фестывальных дзён пераважна будзе арганізавана ў двух вялікіх намётавых лагерах. А для тых, хто захоча проста наведаць канцэрты і паўдзельнічаць у мерапрыемствах, будзе працаваць бясплатная вялікая стаянка аўтамабіля ў крокавай даступнасці ад галоўнай канцэртнай пляцоўкі.
Музычны фестываль стартаваў у 2010 годзе і за кароткі час стаў адной з галоўных візітовак музычна-фестывальнага жыцця Магілёўскай вобласці і Беларусі. Ён адраджае традыцыі сямейнага турыстычнага адпачынку, аб'ядноўвае сяброўскія і карпаратыўныя кампаніі. За трынаццаць гадоў музычны форум наведалі больш за 18 тысяч гледачоў, музыкаў і артыстаў з 16 краін свету.
З больш падрабязнай праграмай фестывалю можна азнаёміцца на афіцыйным сайце праекту.
Арганізатарамі «Вялікі бард-рыбалкі» выступаюць Магілёўскі аблвыканкам і Быхаўскі райвыканкам, Палац культуры Магілёўскай вобласці і творчае аб'яднанне «Свой круг».
